Month: March 2020

Naghambal si Elifaz

1 Dayon nagsabat si Elifaz nga taga-Teman,

2 “Job,ang maalam nga tawo wala nagahambal sing wala sing pulos.

3 Wala siya nagapakigbais sa wala sing pulos nga mga pulong.

4 Pero ang imo iya mga ginapanghambal makatulod sa tawo nga indi na magtahod kag magpangalagad sa Dios.

5 Ang imo mga ginapanghambal bunga sang imo kalautan. Kag ginadayaan mo ang iban paagi sa imo mga pulong.

6 Indi na kinahanglan nga hukman ko pa ikaw. Ang imo mismo ginapanghambal amo ang nagapamatuod kontra sa imo.

7 Nagahunahuna ka bala nga ikaw ang una nga natawo? Natawo ka na bala antes gintuga ang mga bukid?

8 Nabatian mo na bala ang mga plano sang Dios? Ikaw lang bala ang maalam?

9 Ano bala ang imo nahibaluan nga wala man namon nahibaluan? Ano bala ang imo naintiendihan nga wala man namon naintiendihan?

10 Nakatuon kami sa mga tawo nga tigulang na, mas tigulang pa sa imo amay!

11 Ginhambalan ka namon sang mga pulong nga halin sa Dios nga makapabaskog kag makapalipay sa imo. Kulang pa bala ina?

12 Ngaa nagapadala ka sa imo balatyagon? Ano bala ang nagpabulag sa imosa kamatuoran

13 nga naakig ka gid sa Dios kag naghambal sinang malain nga mga pulong kontra sa iya?

14 Mahimo bala sang tawo nga magkabuhi nga matinlo kag matarong?

15 Wala gani nagasalig ang Dios sa iya mga anghel! Kon ining langitnon nga mga tinugaindi gani matinlo sa iya panulok,

16 ang tawo pa ayhan, nga malaot kag makasasala, kag ginauhaw sa paghimo sang malain?

17 “Job,pamatii ako. Sugiran ko ikaw kag paathagan sang akon naeksperiensyahan.

18 Makasugid man parte sini ang maalamon nga mga tawo nga nakatuon sa ila mga katigulangan.

19 Mga maalamon gid sila,kay sila lang ang nagapanag-iya sang ila duta, kag wala sing mga taga-iban nga lugar nga nagsakop sa ila.

20 “Ang malaot nga tawo nagaantos sa bug-os niya nga kabuhi.

21 Permi siya ginakulbaan, kag bisan sa tion nga wala sing katalagman ginakulbaan siya nga basi salakayon siya sang mga tulisan.

22 Nahadlok siya magkadto sa dulom kay basi patyon siya.

23 Nagatalang-talang siya sa pagpangita sang pagkaon bisan diin.Nahibaluan niya nga malapit na siya mapatay.

24 Puwerte ang iya kakulba, pareho sa hari nga manugsalakay sa inaway.

25 Nagakatabo ini sa iya,tungod nagarebelde siyasa Dios nga Makagagahom kag nagabato sa iya.

26 Daw pareho lang nga nagauyat siya sang mabakod nga taming kag gusto gid nga kontrahon ang Dios.

27 Bisan manggaranon kag matambok siya subong,

28 magaestar siya sa guba nga mga banwa, sa mga balay nga wala sing may nagaestar kag daw sa marumpag na.

29 Indi na siya padayon nga magamanggaranon. Ang iya manggad indi magdugay, kag ang iya pagkabutang indi magdamo sa duta.

30 Indi siya makapalagyo sa kalaglagan.Mangin pareho siya sa kahoy nga ang mga salingsing sini masunog. Madula ang tanan niya nga pagkabutang sa isa lang ka paghuyop sang Dios.

31 Indi niya pagdayaan ang iya kaugalingon paagi sa pagsalig sa mga butang nga wala sing pulos, kay wala gid siya sing may makuha sa sini.

32 Sa wala pa mag-abot ang iya tion, mabaton niya ang iya silot kag indi na siya mag-uswag pa.

33 Mangin pareho siya sa ubas nga nagakapulak ang iya hilaw nga mga bunga, ukon pareho sa kahoy nga olibo nga nagakapulak ang iya mga bulak.

34 Kay ang mga indi diosnon magakalamatay nga wala sing mga kaliwat. Kag magakalasunog ang mga balay nga ginpatindog nila paagi sa pagpanguwarta.

35 Nagahunahuna sila permi sa pagpanggamo, paghimo sang malain, kag pagpangdaya.”

Naghambal si Job

1 Dayon nagsabat si Job,

2 “Nabatian ko na ina sang una pa. Imbes nga lipayon ninyo ako, ginapasubo pa gani ninyo ako tapat.

3 Indi na bala kamo mag-untat sa paghambal sing wala sing pulos? Ano gid bala ang nagatublag sa inyo nga sagi kamo ka bais sa akon?

4 Kon kamo sa akon lugar, makahambal man ako pareho sa inyo ginahambal sa akon. Waswasan ko man kamo hambal kag magalungo-lungo sang akon ulo sa inyo.

5 Pero indi ko ina paghimuon. Sa baylo,mahambal ako sang mga pulong nga makapabaskog kag makalipay sa inyo.

6 Pero sa karon, ang akon kasakit nagapadayon bisan ano pa ang akon ihambal. Kag kon maghipos man ako indi gihapon ini madula.

7 “O Dios,ginpakapuyan mo ako. Ginlaglag mo ang bug-os ko nga panimalay.

8 Ginpakurinotmo ako; puwerte na sa akon kaniwang, kag suno sa iban ini nagapamatuod nga nakasala ako.

9 Sa imo kaakig,O Dios,ginsalakay mo ako.Daw pareho ka sa mabangis nga sapat nganaggus-ab sang akon unod. Ginpabagrutan mo ako sang imo ngipon kag gintulok sang masakit nga daw sa kaaway mo ako.

10 “Ginyaguta kag ginkadlawan ako sang mga tawo. Gintampa nila ako sa guya sa pagtamay sa akon. Nag-isa sila kontra sa akon.

11 Gintugyan ako sang Dios sa kamot sang malaot kag makasasala nga mga tawo.

12 Maayo ang akon kahimtangan sadto, pero ginlaglag niya ako. Daw sa ginkuga niya ako kag gindugmok. Ginhimo niya ako nga iya iliguon.

13 Ginlibutan ako sang iya mga manugpana, kag ginpana nga wala sing luoy-luoy. Natuhog ang akon batobato, kag nag-awas ang akon apdo sa duta.

14 Wala untat ang pagpilas niya sa akon; daw isa siya ka soldado nga nagasalakay sa akon.

15 Nagasuksok ako sang sako kag nagapungko sa dutasa pagpangasubo.

16 Nagapalamula ang akon guya sa sobra nga hibi kag nagapalamarok ang akon mata.

17 Wala gid ako sang may nahimo nga sala, kag sinsero gid ako sa akon pagpangamuyo.

18 “Pareho ako sa tawo nga ginpatay nga nagapangabay sa duta nga indi pagtabunan ang iya dugo sa wala pa niya maangkon ang hustisya.

19 Bisan karon ang akon saksiara sa langit. Siya ang magasiling nga wala ako sing sala.

20 Ang akon mga abyan nagatamay sa akon, pero nagahibi ako sa Diossa pagpangayo sang bulig.

21 Ang akon saksi amo ang magapakitluoy sa Dios para sa akon pareho sa isa ka tawo nga nagapakitluoy para sa iya abyan.

22 Kay sa indi madugay magataliwan na ako kag indi na magbalik.”

1 “Madali na lang ako mapatay; daw sa mabugto na ang akon ginhawa. Handa na ang lulubngan para sa akon.

2 Ginalibutan ako sang mga manugtamay. Bulgar gid ang ila pagtamay sa akon.

3 O Dios,buligi ako nga mahilway ako. Wala na sang iban nga makabulig sa akon kundi ikaw lang.

4 Ginlipdan mo ang panghunahuna sang akon mga abyan agod indi sila makaintiendi. Gani indi sila pagtuguti nga magmadinalag-onsa ila nga pag-akusar sa akon.

5 Pareho sila sa tawo nga nagaluib sa iya mga abyan para makakuwarta, nga amo ang kabangdanan sang pag-antossang iya kabataan.

6 “Ginhimo ako sang Dios nga kaladlawan sang mga tawo, kag ginaduplaan nila ako sa guya.

7 Nagapalangdulom na ang akon panulok sa kasubo; daw kalag na ako kaniwang.

8 Ang mga tawo nganagakabig sang ila kaugalingon ngamatarong nagakatingala sa sining natabo sa akon. Ginapakamalaot nila ako subong sa isa ka indi diosnon nga tawo.

9 Para sa ilaang matarong nga tawo malig-on sa iya nga pagkabuhi kag nagabaskog pa gid.

10 Pero ginahangkat ko sila sa pag-usisa liwat sa akon. Sigurado nga masapwan ko nga wala sing bisan isa sa ila nga nakaintiendi.

11 Madali na lang matapos ang akon mga inadlaw. Napaslawan ang akon mga plano kag mga handom.

12 Pero nagasiling sila nga basi mangin maayo man ang akon kahimtangan sa palaabuton. Siling nila, ‘Sa pihak sang kadulom may magaabot nga kasanag.’

13 Kon maglaom gid man ako, ang akon lauman amo ang makaestar na sa lugar sang mga patay. Gusto ko na iplastar ang akon hiligdaan sa sining madulom nga lugar.

14 Kabigon ko na ang lulubngan nga akon amay, kag kabigon ko ang mga ulodnga magaut-ot sa akonnga akon iloy kag mga utod nga babayi.

15 May paglaom pa bala ako? Sin-o ang makasiling nga may paglaom pa ako?

16 Ang akon paglaom magaupod sa akon sa lugar sang mga patay. Magaupod kami didto sa idalom sang duta.”

Naghambal si Bildad

1 Dayon nagsabat si Bildad nga taga-Shua,

2 “Job,san-o mo pa bala untatan inang imo ginapanghambal? Kay-uha bala ang imo ginapanghambal kag maestorya kami sa imo.

3 Ginakabig mo bala kami nga pareho sa mga baka nga wala sing pag-intiendi?

4 Ginahalitan mo lang ang imo kaugalingon sa imo kaakig. Nagahunahuna ka bala nga tungod lang sa imo, pabay-ansang Diosang kalibutan ukon sayluhonniyaang mga bato sa ila sini nahamtangan?

5 “Sa pagkamatuod, ang malaot nga tawo sigurado gid nga mapatay. Pareho siya sang suga nga indi na magsiga.

6 Mangin madulom ang iya tolda kay mapatay ang suga sa iya tupad.

7 Sang una sigurado ang iya mga tikang, pero subong nagakatumba na siya. Ang iya mismo padihot amo ang nagalaglag sa iya.

8 Siya mismo ang naglakat pakadto sa siod, kag nasiod siya.

9 Indi na makahalin ang iya tiil.

10 Ginbutang ini nga siod sa iya alagyan, kag natago ini sa duta.

11 Nalibutan siya sang mga butang nga nagapahadlok sa iya kag daw sa nagalagas ini sa iya.

12 Ang kalamidaddaw sagutom nga tawo nga gusto maglamon sa iya. Ang kalaglagan handa sa paglaglag sa iya.

13 Ang iya panit ginaut-ot sang makamamatay nga balatian kag nagakadunot ang iya mga tiil kag kamot.

14 Ginapahalin siya sa iya elistarannga nagaprotektar sa iya, kag ginadala siya sa makahaladlok nga hari.

15 Madula ang iya elistaran tungod masunog ini sang nagadabadaba nga asupre.

16 Mangin pareho siya sang kahoy nga malaya ang mga gamot kag mga sanga sini.

17 Wala na sing may magdumdom sa iya diri sa kalibutan. Kalimtan na gid siya.

18 Tabugon siya sa sining kalibutan nga masanag pakadto salugar sang mga patay ngamadulom.

19 Wala siya sing mga anak ukon mga kaliwat, kag wala gid sing may mabilin nga buhi sa iya pamilya.

20 Ang mga tawo sa bisan diin nga lugarnagakatingala kag nagakahadlukan sa natabo sa iya.

21 Matuod gid nga amo ina ang dangatan sang malaot nga tawo, nga wala nagakilala sa Dios.”

Naghambal si Job

1 Dayon nagsabat si Job,

2 “Hasta san-o pa ninyo ako paantuson kag sakiton sa inyo mga ginapanghambal?

3 Pila na ka besesnga ginainsulto ninyo ako. Wala kamo mahuya sa pagpakalain sa akon.

4 Kon nakasala gid man ako, akon na ina problema.

5 Nagahunahuna kamo nga matarong kamo sang sa akon, kag ginakabig ninyo ang akon pag-antos nga pamatuod nga nakasala ako.

6 Pero ang Dios ang naghimo sini sa akon. Siya ang nagbutang sang siod sa akon palibot.

7 “Nagapanawag ako sa pagpangayo sang bulig, pero wala sing may nagasabat sa akon. Nagapangayo ako sang hustisya, pero wala sing may nagahatag sini sa akon.

8 Ginbalabagan sang Dios ang akon alagyan agod indi ako makaagi. Gintabunan niya sang kadulom ang akon alagyan.

9 Ginkuha niya ang akon kadungganan kag maayo nga reputasyon.

10 Ginapaantos niya ako bisan diin ako magliso hasta nga daw sa mapatay na ako. Ginkuha niya ang akon paglaom nga daw sa kahoy nga gin-gabot.

11 Puwerte gid ang iya kaakig sa akon, kag ginakabig niya ako nga isa sa iya mga kaaway.

12 Daw pareho lang ngaginpadal-an niya ako sang mga soldado sa pagsalakay sa akon. Ginakibon nila ako palibot sa akon tolda.

13 “Ginpapalagyo niya sa akon ang akon mga paryente.Ang akon mga kilala malayo na sa akon.

14 Wala na ang mga tawo nga malapit sa akon. Ginkalimtan na ako sang akon mga kilala.

15 Ginkabig ako sang akon mga bisita kag kabulig nga mga babayi nga estranghero. Ang pagtan-aw nila sa akon taga-iban nga lugar.

16 Kon magtawag ako sa akon suluguon, wala gid siya nagasabat, bisan pa nga nagapakitluoy ako sa iya.

17 Nabahuan sang akon ginhawa ang akon asawa, kag nangil-aran sa akon ang akon mga utod nga lalaki.

18 Bisan ang magagmay nga mga bata nagatamay sa akon. Kon makita nila ako,ginakadlawan nila ako.

19 Ang tanan nga suod ko nga abyan nangil-aran sa akon. Gintalikdan ako sang akon mga ginahigugma.

20 Daw sa tul-an na lang ako nga naputos sang panit, kag daw halos mapatay na ako.

21 “Maluoy kamo mga abyan ko. Kaluoyi ninyo ako, kay ginapaantos ako sang Dios.

22 Ngaa ginahingabot ninyo ako pareho sang ginahimo sang Dios sa akon? Indi pa bala tuman ang inyo pagpaantos sa akon?

23 Maayo kuntani kon ginsulat ang mga ginpanghambal ko sa isa ka libro,

24 ukonginsinsil sing maayo sa bato agod indi mapanas hasta san-o.

25 “Pero nahibaluan ko nga buhi ang akon manug-apin,kag sa ulihi magaabot siya sa dutasa pag-apin sa akon.

26 Kon madunot na ang akon panit kag maghalin na ako sa akon lawas, makita ko ang Dios.

27 Makita ko siya mismo sang akon mga mata, kag indi na siya mangin iban sa akon. Dako gid ang akon handom nga makita siya.

28 “Kon padayunon ninyo ang pag-akusar sa akon nga nagaantos ako tungod sa akon sala,

29 magaabot gid sa inyo ang makahaladlok nga silotsang Dios. Huo, silutan gid niya kamo tungod sa iya kaakig. Dayon mahibaluan ninyo nga ginasentensyahan kamosang Dios.”

Naghambal si Zofar

1 Dayon nagsabat si Zofar nga taga-Naama,

2 “Kinahanglan nga magsabat ako kay indi ako mapahamtang.

3 Ginsabdong mo ako nga may pag-insulto, kag karon may nagatulod sa akon panghunahuna nga magsabat ako sa imo.

4 Sigurado gid nga nahibaluan mo nga halin pa sang una, umpisa sang pagtuga sa tawo sa kalibutan,

5 ang kalipay sang malaot nga mga tawo umalagi lang. Huo, wala nagadugay ang kalipay sang mga tawo nga indi diosnon.

6 Bisan puwerte ang iya pagkamatinaas-taason, nga daw lambot na ini sa mga panganod ukon sa langit,

7 madula siya hasta san-o pareho sang iya tai. Ang mga nakakilala sa iya, mamangkot kon diin na siya.

8 Madula siya pareho sang damgo ukon sang palanan-awon sa kagab-ihon, kag indi nagidsiya makita.

9 Indi na siya makita sang nakakilala sa iya, kag madula siya sa lugar nga iya anay ginaestaran.

10 Ang iya mga anak amo ang magabayad sa mga imol sa iya mga kinawat sa ila.

11 Mapatay siya kag ilubong nga bataon kag makusog pa.

12 “Ang paghimo sang kalautan pareho sa pagkaon nga matam-is sa iya baba,

13 kag ginaugom niya ini sing malawig agod masaboran gid niya.

14 Pero pag-abot sini sa iya tiyan mangin mapait ini kag magahilo sa iya pareho sa dalit sang man-og.

15 Isuka niya pareho sa pagkaon ang manggad nga iya ginkawat. Bisan ara na ini sa iya tiyan ipasuka ini sang Dios sa iya.

16 Magasuyop siya sang dalit sang mga man-og nga amo ang magapatay sa iya.

17 Indi na niya matilawan ang bugana nga lana, gatas kag dugos, nga daw sa sapa ukon suba nga nagailig.

18 Indi siya makabaton sing balos sa iya pagpangabudlay. Indi siya makapangalipay sa iya manggad.

19 Kay ginpigos niya ang mga imol kag ginpabay-an niya sila nga pigado. Gin-agaw niya ang mga balay nga indi iya.

20 Wala siya nagakaayawan sa iya pagkadalok. Ang tanan nga magustuhan niya indi makaluwas sa iya.

21 Pero wala na sing may mabilin sa iya nga iya makaon, kay ang iya manggad madula.

22 Sa iya kabuganaan, magaabot sa iya ang kalisod. Puwerte gid nga pag-antos ang magaabot sa iya.

23 Kon mabusog na niya ang iya kaugalingon, ipaagom sang Dios sa iya ang iya puwerte nga kaakig, kag paulanan siya sang silot.

24 Bisan makapalagyo man siya sa salsalon nga armas, matuhog gihapon siya sang saway nga pana.

25 Matuhog ang iya apdo, kag magalapos ang pana sa iya lawas. Magaabot sa iya ang kahadlok.

26 Madula ang iya manggad sa kadudulman. Sunugon siya kag ang tanan nga nabilin sa iya elistaransang kalayo nga indi tawo ang nagpasiga.

27 Ipahayag sang langit ang iya sala kag magasaksi ang duta kontra sa iya.

28 Pagaanuron sang baha ang iya balay sa adlaw nga ipaagom sang Dios ang iya kaakig.

29 Amo ina ang kapalaran sang malaot nga tawo nga gintalana sang Dios para sa iya.”

Naghambal si Job

1 Dayon nagsabat si Job,

2 “Pamatii ninyo ako sing maayo agod mapalipay man ninyo ako.

3 Pamati kamo samtang nagahambal ako, kag kon makatapos na gani ako, yagutaa gihaponninyo ako kon gusto ninyo.

4 Ang akon reklamo indi kontra sa tawokundi sa Dios. Amo ini ang rason kon ngaa dali ako maakig.

5 Tan-awa bala ninyo ako kag makapanabon gid kamo sang inyo kamot sa inyo baba sa katingala, nga indi makapatisa natabo sa akon.

6 Kon hunahunaon ko ang mga nagakatabo sa akon, nagakurog ako sa kahadlok.

7 “Ngaa padayon nga nagakabuhi ang mga malaot? Nagatigulang pa sila kag nagamauswagon.

8 Kag makita pa nila ang pagdako sang ila mga anak kag mga apo.

9 Nagaestar pa sila sa ila mga balay nga wala sing katalagman kag wala sing may ginakahadlukan. Kag wala sila ginasilutan sang Dios.

10 Wala nagakapalyar sa pagpamata ang ila mga baka, kag wala ini ginahar-asi.

11 Ang ila mga bata madamo pareho sa mga karnero.Nagasinaot sila,

12 nagakinanta, kag nagakinalipay sa tukar sang tamborin, arpa kag plawta.

13 Nagakabuhi sila nga mainuswagon kag nagakalamatay nga malinong.

14 Pero nagasiling sila sa Dios, ‘Pabay-i lang kami! Wala kami nagahandom nga mahibaluan ang imo mga pamaagi.

15 Sin-o gid bala ikaw nga ginatawag Makagagahom? Ngaa dapat ka namon alagaron? Kag ano gid ang amon makuha kon magpangamuyo kami sa imo?’

16 Pero ang matuod, ang ila pag-uswag wala naghalin sa ila kaugalingon nga pagpangabudlay. Gani kon ano man ang ilaygay sining mga malaot, indi gid ako magpamati.

17 “Diutay lang ang nagakapatay nga malaot nga mga tawo. Talagsa lang nagaabot sa ila ang kalisod ukon ang kasakit nga ginapadala sang Dios tungod sa iya kaakig.

18 Talagsa lang sila ginatabog nga daw sa dagami ukon upa nga ginapalid sang mabaskog nga hangin.

19 Nagasiling kamo nga kon indi sila pagsilutan sang Dios, ang ila mga kabataan amo ang iya silutan. Pero nagasiling ako nga ang nakasala amo ang dapat silutan sang Dios, agod maeksperiensyahan nila

20 kag makita nila mismo ang ila kalaglagan. Pabay-i nga matilawan nila ang kaakig sang Makagagahomnga Dios.

21 Kay kon patay na sila wala na sila kalibutan sa nagakalatabo sa ila panimalay.

22 “Makatudlo bala ang tawo sa Dios, sanglit siya ang pinakamataas nga hukom?

23 May mga tawo nga nagakapatay nga bugana kag matawhay ang ila kahimtangan,

24 kag maayo ang ila lawas.

25 May mga tawo man nga nagakapatay nga mapait ang ila kahimtangan, kag wala gid makatilaw sang maayo nga pangabuhi.

26 Pero pareho lang sila nga ilubong sa duta kag pagakaunon sangmgaulod.

27 “Nahibaluan ko gid kon ano ang inyo ginahunahuna. Nahibaluan ko ang inyo mga padihot kontra sa akon.

28 Sugiran ninyo ako sang mga tawo nga manggaranon nga nagkalaguba ang ila mga balay tungod sa ila kalautan.

29 Pero pamangkuta ang mga nagaalagi, kag pamatii ang ila mga ginasiling.Kay sugiran nila kamo

30 nga bisan ang malaot nga mga tawo nagakaluwas sa adlaw nga mag-abot ang kalamidad tungod sa kaakigsang Dios.

31 Wala gid sing may nagasabdong sing hayag sa malaot nga tawo. Wala gid sing may nagabalos sa iya ginhimo.

32 Kon ilubong na siya, may nagaguwardya pa sang iya lulubngan.

33 Madamo ang nagakumpanyar sa iya, kag ang duta nagahatag sang kapahuwayan sa iya.

34 “Gani paano ninyo ako mapalipay sa inyo mga ginahambal nga wala sing pulos? Wala gid sing kamatuoran ang inyo ginasiling.”

Naghambal si Elifaz

1 Dayon nagsabat si Elifaz nga taga-Teman,

2 “May mabulig bala ang tawo sa Dios, ukon bisan ang maalam nga tawo?

3 Mapalipay mo bala ang Makagagahomnga Dioskon matarong ka? May makuha bala siya sa imo kon wala sing kasawayan ang imo kabuhi?

4 Ginasabdong ka sang Dios kag ginasentensyahan indi tungod kay nagatahod ka sa iya,

5 kundi tungod kay puwerte na gid ang imo kalautan kag wala na sang untat ang imo pagpakasala.

6 Kay ginakuha mo nga wala sing kaluoy ang bayo sang imo isigkatawo bilang garantiyasa iya utang sa imo.

7 Wala mo ginahatagan sang tubig ang mga ginauhaw, kag wala mo man ginahatagan sang pagkaon ang mga ginagutom.

8 Ginagamit mo ang imo pagkagamhanan kag pagkadungganon sa pag-angkon sang duta.

9 Kon magpangayo sa imo sang bulig ang mga balo nga babayi, ginapapauli mo sila nga wala sing dala. Pati ang mga ilo wala mo ginatratar sing maayo.

10 Amo ina kon ngaa ginalibutan ka sang mga siod, kag nagaabot sa imo ang gulpi nga kahadlok.

11 Amo ina kon ngaa nadulman ka kag indi makakita, kag ginalapawan sang baha.

12 “Ang Dios ara sa pinakaibabaw sang langit, labaw pa sa pinakamataas nga mga bituon.

13 Amo ina kon ngaa nagasiling ka, ‘Wala nakahibalo ang Dios sa akon ginahimo. Natabunan siya sang gal-om, paano siya makahukom?

14 Ginalikupan siya sang madamol nga mga panganod, gani indi niya kita makita samtang nagalakat siya sa ibabaw sang langit.’

15 “Magpadayon ka bala sa pagsunod sa pagginawi nga dugay na nga ginasunod sang malaot nga mga tawo?

16 Nagkalamatay sila sa wala pa ang ila tion; pareho sila sa pundasyon sang balay nga gin-anod sang baha.

17 Nagsiling sila sa Makagagahom nga Dios, ‘Pabay-i lang kami! Ano bala ang mahimo mo para sa amon?’

18 Pero ang Dios amo ang nagpuno sang ila mga balay sang maayo nga mga butang. Gani kon ano man ang ilaygay sining malaot nga mga tawo, indi gid ako magpamati.

19 “Kon makita sang matarong kag inosente nga mga tawo ang pagkalaglag sang malaot nga mga tawo, magakalipay sila kag magakadlaw sa ila.

20 Magasiling sila,‘Nalaglag gid ang aton mga kaaway, kag ginlamon sang kalayo ang ila pagkabutang.’

21 “Job,magpasakop ka sa Dios kag magpakighusay sa iya agod pakamaayuhon niya ikaw.

22 Batuna ang iya mga pagtudlo kag tipigi ang iya mga pulong sa imo tagipusuon.

23 Kon magbalik ka sa Makagagahomnga Dios, kag kuhaon mo ang kalautan sa imo panimalay, ibalik niya ang imo maayo nga kahimtangan.

24 Indi paghatagi sang biliang imo mga bulawan; kabiga ina nga daw sa balas lang ukon daw sa mga bato lang sa suba.

25 Dayon ang Makagagahomnga Diosmangin pareho sang bulawan kag malahalon nga pilak sa imo.

26 Dayon masapwan mo ang kalipay nga nagahalin sa Makagagahom nga Dios, kag indi ka mahuya sa pagpalapit sa iya.

27 Magapangamuyo ka sa iya kag pamatian ka niya, kag pagatumanon mo ang imo mga promisa sa iya.

28 Ano man ang ginaplano mo nga himuon, matuman ini, kag mangin masanag ang imo alagyan.

29 Kon may ara sang tawo nga nagakaluya, kag kon magpangamuyo ka sa Dios nga pabakuron siya, buligan niya ang amo nga tawo.

30 Bisan ang tawo nga nakasala luwason niya paagi sa imo matarong nga kabuhi.”

Naghambal si Job

1 Dayon nagsiling si Job,

2 “Hasta subong puwerte gid ang akon reklamo. Ginapaantos pa gid ako sang Dios sa pihak sang akon pag-ugayong.

3 Kon nahibaluan ko lang kon diin ko siya pangitaon; kon makakadto lang ako sa iya ginaestaran,

4 ihambal ko gid sa iya ang akon kaso kag ipresentar ko ang akon mga rason.

5 Gusto ko mahibaluan kon ano ang isabat niya sa akon, kag gusto ko intiendihon ang isiling niya.

6 Baison ayhan niya ako paagi sa iya gahom? Siyempre indi! Pamatian niya ang akon ihambal.

7 Ang matarong nga tawo nga pareho sa akon makarason sa atubangan sangDios ngaakon Manughukom, kag hilwayon niya ako hasta san-o.

8-9 “Ginpangita ko ang Dios sa palibot—sa sidlangan, nakatundan, aminhan, kag bagatnan—pero wala ko siya makita.

10 Pero nahibaluan niya ang akon ginahimo. Sa tapos nga matilawan niya ako, masapwan niya ngamatinloako pareho sapuro ngabulawan.

11 Ginsunod ko ang iya mga pamaagi, kag wala gid ako naglikaw sa sini.

12 Ginatuman ko permi ang iya sugo, kag ginatipigan ko ini sa akon tagipusuon.

13 Pero pagusto ang Dios sa iya ginahimo; wala sing may makabalabag sa iya. Ginahimo niya ang iya naluyagan.

14 Gani himuon niya ang iya ginplano nga himuon sa akon, kag madamo ang iya plano sa akon.

15 Amo gani nga nahadlok ako sa iya. Kon hunahunaon ko ini, puwerte ang akon kahadlok.

16 Ginpaluya kag ginpahadlok ako sang Dios nga Makagagahom.

17 Pero wala ako nag-untat sa pagreklamo bisan daw sa natabunan ako sang puwerte nga kadulom.

Nagpamangkot si Job Kon Ngaa Wala Ginasilutan sang Dios ang Malaot nga mga Tawo

1 “Ngaa wala nagatalana ang Makagagahomnga Diossang tion sa paghukomsa malaot nga mga tawo? Ngaa wala makita sang mga nagakilala sa iya inang tion sa paghukom?

2 Nagapanguha sang duta ang malaot nga mga tawo paagi sa paghalin sang mga muhon.Nagapangawat sila sang mga sapat kag ginaimpon nila sa ila mga sapat.

3 Ginakawat nila ang mga asno sang mga ilo, kag ginakuha nila bilang garantiya sa utang ang baka sang balo nga babayi.

4 Ginapigosnila ang mga imol, gani napilitan ini nga magpanago.

5 Nagapangita sila sang ila pagkaon sa kamingawan pareho sa talunon nga mga asno. Halos wala na sing iban nga lugar nga mapangitaan nila sang pagkaon para sa ila mga anak.

6 Nagapanipot sila sang mga patubas sa uma, pati sa talamnan sang ubas sang malaot nga mga tawo.

7 Nagatulog sila kon gab-i nga ginatugnawan, kay wala sila sing habol kag kulang ang ila bayo.

8 Nagakabasa sila sang ulan nga nagatupa sa mga kabukiran, kag nagadasok sila sa higad sang mga bato tungod kay wala sila sing pasilungan.

9 “Ginakuhasang malaot nga mga tawoang bata sang balo kag imol nga babayi bilang bayad sa utang.

10 Nagalakat ang mga imol nga kulang sing bayo; ginapapas-an sila sang mga inaninga uyaspero gutom sila.

11 Ginapapuga sila sang olibo kag ubas, pero indi sila makatilaw sini.

12 Mabatian sa siyudad ang mga pag-ugayong sang mga tagumatayon kag ang pagpangayo sang bulig sang mga napilasan sing grabe, pero wala gid pagbalusi sang Dios ang naghimo sing malain sa ila.

13 “May mga tawo nga nagakontra sa kasanag. Wala sila nagalakat sa kasanag kag wala nila ini naintiendihan.

14 Ang manugpatay nagabangon aga pa sa pagpatay sang mga imol, kag kon gab-i nagapangawat siya.

15 Ang nagapanginbabayi nagahulat magdulom agod wala sing may makakita sa iya. Ginatabunan niya ang iya nawong agod wala sing may makakilala sa iya.

16 Kon gab-i nagasulod ang mga kawatan sa mga balay, pero kon adlaw nagapanago sila, kay nagalikaw sila sa kasanag.

17 Ginakabig nila ang kadulom nga kasanag, kay mas gusto nila ang makahaladlok nga kadulom.

Ang Sabat sang Abyan ni Job

18 “Pero indi magadugay ang malaot nga mga tawo pareho sa bukal sang tubig. Ang duta nga ila ginapanag-iyahan ginapakamalaotsang Dios. Gani wala sing may nagakadto sa ila talamnan sang ubas.

19 Subong nga ang snow nagakatunaw kag nagakadula sa init, ang mga makasasala madula man sa kalibutan.

20 Indi na sila pagdumdumon pa kundi kalimtan na sila bisan sang ila iloy. Laglagon sila pareho sa kahoy nga gin-utod, kag kaunon sila sang mga ulod.

21 Kay wala nila pagtratara sing maayo ang mga baw-as nga babayi. Kag wala nila ginakaluoyan ang mga balo nga babayi.

22 “Ginalaglag sang Dios ang gamhanan nga mga tawo paagi sa iya gahom. Bisan malig-on sila, wala sing kasiguruhan ang ila kabuhi.

23 Posible nga tugutan sila sang Dios nga magkabuhi nga wala sing katalagman, pero ginabantayan gid sang Dios ang tanan nila nga hulag.

24 Sa malip-ot nga tion nagauswag sila, pero sa indi madugay magakawala sila pareho sa bulak nga nagakalaya ukon pareho sa uhay nga gin-garab.

25 Kon indi husto ang akon ginasiling, sin-o ang makapamatuod nga nagabutig ako? Sin-o ang makasiling nga sayop ako?”