1 Dayon nagsabat si Bildad nga taga-Shua,
2 “Gamhanan kag talahuron ang Dios. Ginapaluntad niya ang kalinong sa kalangitan.
3 Maisip bala ang iya mga soldado? May lugar bala nga wala nasanagan sang iya kasanag?
4 Paano makasiling ang isa ka tawo nga matarong siya sa atubangan sang Dios? May ara bala nga natawo nga matinlo?
5 Kon bisan ang bulan kag ang mga bituon indi masanag sa iya panulok,
6 ano pa ayhan ang tawo nga pareho lang sa isa ka ulod.”
1 Dayon nagsabat si Job,
2 “Nagahunahuna ka nga nabuligan mo ako nga maluya kag wala sing ikasarang.
3 Nagahunahuna ka nga nalaygayan mo ako nga wala sing alam paagi sa imo puwerte nga kaalam.
4 Diin bala naghalin inang imo mga ginpanghambal? Kay sin-o espiritu ang nagtudlo sa imo sa paghambal sina?
5 “Nagakurog sa kahadlok ang mga patay sa ila nahamtangan didto sa idalom sang tubig.
6 Hayag gid sa Dios ang lugar sang mga patay. Wala sing may makatabon sa lugar sang kalaglagan.
7 Ginahumlad sang Dios ang aminhannga kalangitansa mahawan nga lugar, kag ginapakabit niya ang kalibutan sa kahawaan.
8 Ginaputos niya ang ulan sa mga gal-om, pero ang gal-om wala nagakabusdik bisan mabug-at ini.
9 Ginatabunan niya sang iya gal-om ang ugsad nga bulan.
10 Ginhimo niya ang daw tinabuan sang langit kag sang dagat,bilang dulunan sang kasanag kag sang kadulom.
11 Sa iya nga pagsabdong nagatay-og ang mga haligi sang langit.
12 Sa iya nga gahom ginalabugay niya ang dagat, kag sa iya nga kaalam ginlaglag niyaang dragon ngasi Rahab.
13 Sa iya nga paghuyop nagtin-aw ang langit, kag sa iya nga gahom ginpatay niya ang nagasaog nga dragon.
14 Ini simple lang nga mga butang nga iya ginhimo. Daw isa lang ini ka hutik nga aton nabatian. Karon, sin-o bala ang makatungkad sang pagkagamhanan sang Dios?”
1 Nagpadayon si Job sa paghambal,
2 “Nagasumpa ako sa buhi nga Makagagahom nga Dios nga wala naghatag sa akon sang hustisya kag nagpalain sang akon buot.
3 Samtang nagaginhawa pa ako, kag ginatugutan pa ako sang Dios nga mabuhi,
4 indi gid ako maghambal sang kalautan kag indi gid ako magbutig.
5 Indi ko gid pagbatunon nga husto kamo. Iinsister ko gid nga inosente ako hasta nga mapatay ako.
6 Tindugan ko gid nga matarong ako, kag indi gid ako mag-untat. Samtang buhi ako limpyo ang akon konsensya.
7 “Kabay pa nga ang mga nagakontra sa akon silutan sang Dios sang silot nga bagay sa malaot nga mga tawo.
8 Kay ano bala ang paglaom sang indi diosnon nga tawo kon kuhaon na sang Dios ang iya kabuhi?
9 Magapamati bala ang Dios sa iya pagpangayo sang bulig kon ang katalagman magaabot sa iya?
10 Malipay ayhan siya sa Makagagahom nga Dios? Magapanawag bala siya sa iya sa tanan nga tion?
11 “Tudluan ko kamo parte sa gahom sang Makagagahom nga Dios. Isugid ko gid sa inyo kon ano ang iya mga pamaagi.
12 Pero kamo tanan nakakita sini. Ti, ngaa nagahambal pa kamo sa akon sang wala sing pulos?
13 “Amo ini ang kapalaran nga gintalana sang Dios nga Makagagahom sa malaot kag mapintas nga mga tawo:
14 Bisan madamo pa ang iya mga anak, ang iban sa ila mapatay sa inaway ukon sa gutom.
15 Ang mabilin sa ila nga buhi mapatay sa balatian, kag wala sing may magpangasubo sa ila kamatayon, bisan ang ila mga asawa.
16 “Bisan magtipon pa sang madamo gid nga pilak kag bayo ang malaot nga tawo,
17 indi siya ang makapulos sini. Ang matarong kag inosente nga mga tawo ang magasuksok sang iya mga bayo, kag partidahon nila ang iya pilak.
18 Ang ginapatindog niya nga balay parehokagabok sa lawasang damang ukon sang kamalig sang manugbantay sang talamnan.
19 Magahigda siya nga manggaranon, pero pagbugtaw niya wala na ang tanan niya nga manggad.
20 Magaabot sa iya ang kahadlok nga daw baha kag paliron siya sang mabaskog nga hangin sa kagab-ihon.
21 Paliron siya sang hangin nga halin sa sidlangan, kag madula siya sa iya ginaestaran.
22 Magahuyop ini sa iya nga wala sing luoy-luoy samtang nagatinguha gid siya sa pagpalagyo.
23 May magapamalakpak kag magapanagitsit sa pagyaguta sa iya tungod nga nadula siya sa iya ginaestaran.
1 “May mga minahan nga sa diin makita ang mga pilak, kag may mga lugar nga sa diin ginapapuraw ang mga bulawan.
2 Ang salsalon ginakuha sa duta, kag ang saway ginatunaw halin sa mga bato.
3 Nagagamit ang mga tawo sang suga agod indi madulom kon magkutkot sila sa idalom gid sang duta. Nagakutkot sila sang mga bato sa kadadalman.
4 Nagakutkot sila sang alagyan sa minahan, sa lugar nga wala ginaestaran ukon ginaagyan sang mga tawo. Nagapanaog sila paagi sa mga lubid nga nagahabyog-habyog.
5 Sa ibabaw sang dutanagatubo ang mga tanom ngaginahalinan sang pagkaon, pero sa idalom sang duta daw sa ginporma sang kalayo.
6 Ang mga bato sang duta may sapirokag ang mga yab-ok sini may bulawan.
7 Ang mga alagyansa minahanwala makita sang mga uwak ukon sang mga dapay,
8 kag wala maagyan sang mapintasnga mga sapatukon sang leon.
9 Ginakutkot sang mga tawo ang pinakamatig-a nga mga bato bisan pa ang idalom nga bahin sang mga bukid.
10 Nagabuho sila sang alagyan sa dalagko nga mga bato, kag makita nila ang nagkalain-lain nga malahalon nga mga bato.
11 Nagakutkot sila sa ginahalinansang mga suba, kag ginakuha nila ang natago nga mga manggad kag ginadala sa kasanag.
12 “Pero diin bala makita ang kaalam ukon pag-intiendi?
13 Wala nakahibalo ang tawo kon diin ini makita.Indi ini makita diri sa kalibutan.
14 Indi man ini makita bisan sa kadadalman sang dagat.
15 Indi ini mabakal sang puro nga bulawan ukon sang pilak.
16 Indi matupungan ang bili sini sang puro gid nga bulawan ukon sang malahalon ngamga bato ngaonix kag sapiro.
17 Labaw pa ini sa bulawan ukon kristal. Indi ini mabaylo sa alahas nga bulawan.
18 Ang bili sini labaw pa sa bili sang coral, haspe, ukon rubi.
19 Indi ini matupungan sang topasio nga halin sa Etiopiakag indi ini mabakal sang puro nga bulawan.
20 “Ti, diin bala makita ang kaalam ukon ang pag-intiendi?
21 Wala sing buhi nga tinuga nga makakita sini bisan pa ang mga pispis.
22 Bisan ang lugar sang kalaglagan, nga amo ang lugar sang mga patay, kuno-kuno lang ang ila nabatian parte sini.
23 Ang Dios lang gid ang nakahibalo kon sa diin makita ang kaalam.
24 Kay makita niya bisan pa ang pinakamalayo nga parte sang kalibutan, kag makita niya ang tanan sa idalom sang langit.
25 Sang ginhuyop niya ang hangin, kag sang gintakos niya kon ano kadamol sang ulan nga magtupa,
26 kag sang gindesisyunan niya kon diin magtupa ang ulan kag kon diin mag-agi ang mga kilat nga may daguob,
27 amo ato nga tion nga ginpakita niya ang kaalam kag ang kabilidhonsini. Gintestingan niya ini kag gin-aprobahan.
28 Dayon nagsiling siya sa mga tawo, ‘May kaalam kamo kag pag-intiendi kon nagatahod kamo sa Ginoo kag nagalikaw sa kalautan.’ ”
1 Nagpadayon pa gid si Job sa paghambal,
2 “Kon mabalik lang kuntani ang mga nagligad nga mga inadlaw sang ginabantayan pa ako sang Dios,
3 sang ginasanagan pa niya ang akon dalanon samtang nagalakat ako sa madulom.
4 Sadtong tion nga maayo pa ang akon kahimtangan, ang Dios amo ang akon suod nga abyan, kag ginapakamaayo niya ang akon panimalay.
5 Ginaupdan pa ako sadto sang Makagagahomnga Dios, kag kaupod ko pa ang akon mga anak.
6 Sadto nga tion, ang akon mga baka nagahatag sang madamo gid nga gatas, kag ang akon mga talamnan sang olibo nagahatag sang madamo gid nga lana.
7 Kon magkadto gani ako sa puwertahan sang banwa, kag mag-upod sa mga manugdumala sang banwa kon magmiting sila,
8 nagapahigad ang pamatan-on nga mga lalaki kon makita nila ako, kag ang mga tigulang nagatindogsa pagtahod sa akon.
9 Nagahipos bisan ang mga pangulo
10 kag ang dungganon nga mga tawopagkakita nila sa akon.
11 Ang bisan sin-o nga nakakita sa akon ukon nakabati sa akon maghambal, nagadayaw sa akon.
12 Kay ginabuligan ko ang mga imol nga nagapangayo sang bulig kag ang mga ilo nga wala sing dalangpan.
13 Ginapakamaayo ako sang tagumatayon nga mga tawonga akon ginbuligan, kag nalipay gid ang mga balo nga babayinga akon man ginbuligan.
14 Ginahimo ko permi ang matarong kag husto; daw bayo kag turban ini nga akon ginasuksok.
15 Nangin pareho ako sang mata sa tawo nga bulag kag tiil sa tawo nga piang.
16 Nangin pareho ako sang isa ka amay sa mga imol, kag bisan ang mga estranghero ginbuligan ko sa ila mga kaso.
17 Gindula ko ang gahom sang malaot nga mga tawo kag ginluwas ang ila mga biktima.
18 “Naghunahuna ako nga magakabuhi ako sing malawig kag mapatay nga ginalibutan sang akon pamilya.
19 Kay pareho ako sadto sangmabakod ngakahoy nga nagapangalapkap ang mga gamot sa tubig kag permi ginatun-ogan ang mga sanga.
20 Ginadayaw ako permi sang mga tawo kag permi ako mabaskog.
21 Nagahipos ang mga tawo kag nagapamati sing maayo sa akon mga laygay.
22 Pagkatapos ko hambal, wala na sila sang may idugang pa kay kontento sila sa akon ginhambal.
23 Ginahandom nila ang akon mga pulong pareho sang ila paghandom sa ulan. Gusto gid nila ini nga pamatian.
24 Daw indi sila makapati kon magyuhom ako sa ila;ang akon malipayon nga nawong nakapabaskog sa ila.
25 Ginatudluan ko sila sang ila himuon pareho sa isa ka pangulo. Ginadumalahan ko sila pareho sa isa ka hari nga nagadumala sa iya mga soldado. Ginalipay ko sila kon nagakasubo sila.
1 “Pero karon ginayaguta ako sang mga tawo nga bata pa sang sa akon, nga ang ila mga amay indi gid masaligan. Mas masaligan pa gani ang akon mga ido nga nagabantay sang akon mga karnero.
2 Ano gid bala ang makuha ko sa sini nga mga tawo nga mga maluya kag wala sing kusog?
3 Puwerte sa ila kaniwang sa sobra nga kinawad-on kag kagutom. Nagakitkit na lang silasang mga kararutonsa kamingawan bisan kon gab-i.
4 Ginapanggabot nila kag ginakaon ang mga tanom sa kamingawan, bisan pa ang malas-ay nga gamot sang kahoy nga enebro.
5 Ginatabog sila palayo sa ila mga kasimanwa kag ginasinggitan nga daw sa mga kawatan.
6 Nagaestar na lang sila sa mamala nga mga ililigan sang tubig, sa mga guhab sang mga bato, kag sa mga buho sa duta.
7 Daw sa mga sapat sila nga nagauwang sa kagulangan, kag nagadas-ukanay sila sa puno sang mga kahoy-kahoy.
8 Wala sila sing pulos kag wala gani sing may nakakilala sa ila, kag gintabog sila sa ila duta.
9 “Kag karon ginatamay ako sang ila mga anak paagi sa kanta. Nangin kaladlawan ako sa ila.
10 Ginakangil-aran nila ako kag nagalikaw sila sa akon. Wala sila natahap sa pagdupla sa akon guya.
11 Karon nga ginapaluya kag ginapaantos ako sang Dios, ginhimo nila ang ila gusto nga himuon sa akon.
12 Ginasalakay ako sang sining malaot nga grupo. Nagabutang sila sang siod sa akon dalanon, kag ginatinguhaan gid nila ako nga laglagon.
13 Ginabalabagan nila ang akon alagyan sa paglaglag sa akon. Nagmadinalag-on sila bisan wala sing may nagabulig sa ila.
14 Ginasalakay nila ako pareho sa mga soldado nga nagaagi sa dako nga buho sang pader nga gin-guba.
15 Puwerte ang akon kahadlok, kag nadula ang akon dungog kag manggad pareho sa panganod nga ginpalid sang mabaskog nga hangin.
16 Kag karon daw sa mapatay na ako; wala untat ang akon pag-antos.
17 Kon gab-i nagangutngot ang akon mga tul-an; ang kasakit nga akon ginabatyag wala nagauntat.
18 Sa puwerte nga kusog sang Dios, ginliab niya ako. Gin-uyatan niya ako sa kuwelyo
19 kag ginhaboy sa lunang. Daw pareho na lang ako sa yab-ok kag abo.
20 “Nagapanawag ako sa imo,O Dios,pero wala ka nagasabat. Nagatindog ako sa imo presensya, pero ginatulok mo lang ako.
21 Nangin mapintas ka sa akon. Gin-gamit mo ang imo puwerte nga gahom sa pagpaantos sa akon.
22 Daw pareho lang nga ginapapalid mo ako sa hangin kag ginapabulubaliskad sa bagyo.
23 Nahibaluan ko nga ginadala mo ako sa lugar sang mga patay, sa lugar nga gintalana mo nga kadtuan sang tanan nga tawo.
24 “Wala gid ako sing may ginhalitan nga tawo nga nagaantos kag nagapakitluoy tungod sa kalisod.
25 Naghibi gani ako sa mga tawo nga nalisdan. Naluoy gid ako samgaimol.
26 Pero sang naglaom ako nga himuan ako sang maayo, malain ang ginhimo sa akon. Nagpangita ako sang kasanag, pero kadulom ang nag-abot sa akon.
27 Wala untat ang kasakit sang akon balatyagon. Adlaw-adlaw nagaabot ang pag-antos sa akon.
28 Nag-ilitom ang akon panit indi tungod sa kainit sang adlawkundi sa balatian. Nagatindog ako sa katilingban kag nagapangayo sang bulig.
29 Ang akon tingog daw pareho sa uwang sang talunon nga ido ukon huni sang bukaw.
30 Nag-itom ang akon panit kag nagkalahulog ang kugan. Puwerte gid ang akon hilanat.
31 Nangin masubo ang sunata sang akon arpa kag plawta.”
1 “Nagpromisa ako sa akon kaugalingon nga indi gid magtulok nga may kailigbon sa mga dalaga.
2 Kay ano nga balos ang ihatag sang Makagagahom nga Dios sa langit sa ginahimo sang tawo?
3 Indi bala kalaglagan kag kalalat-an para sa mga nagahimo sang kalautan?
4 Nahibaluan sang Dios ang tanan ko nga ginahimo.
5 Kon nagabinutig ako kag nagapangdaya,
6 kabay pa nga hukman ako sang Dios. Kay siya ang nakahibalo kon nakasala ako.
7 Kon wala ako magsunod sa husto nga dalan kag ginsunod ko ang kailigbon sang akon mga mata, kag gindagtaan ko ang akon kaugalingon,
8 kabay pa nga magkalapierdi ang akon mga tanom ukon kaunon ini sang iban.
9 Kon naganyat ako sang babayi ukon nagapangaluyag ako sa asawa sang akon kaingod,
10 kabay pa nga kuhaon ukon huliran sang iban nga lalaki ang akon asawa.
11 Kay ang pagpanginbabayi makahuluya nga sala, kag dapat gid nga silutan ang nagahimo sina.
12 Pareho ini sa makahalalit nga kalayo nga makalaglag sang tanan ko nga pagkabutang.
13 “Kon ginbaliwala ko ang kinamatarong sang akon mga suluguon sang magreklamo sila sa akon,
14 ano ang himuon ko kon hukman ako sang Dios? Ano ang isabat ko kon usisaon niya ako?
15 Indi bala nga ang Dios nga naghimo sa akon amo man ang naghimo sa akon mga suluguon?
16 “Kon wala ako nagbulig sa mga imol kag sa mga balo nga babayi nga nalisdan,
17 kagkongindalukan ko sang pagkaon ang mga ilo,kabay pa nga silutan ako sang Dios.
18 Pero halin pa sang bataon ako ginaatipan ko na ang mga ilo; sa bug-os ko nga kabuhi wala ako nagpabaya sa mga balo nga babayi.
19 Kon may makita ako nga tawo nga nagaantos sa katugnaw tungod nga kulang siya sang bayo,
20 ginahatagan ko siya sang bayo nga pangtugnaw nga hinimo halin sa bulbol sang akon mga karnero. Dayon nagapasalamat siya sa akon sing tinagipusuon.
21 Kon ginsakit ko sang akon kamot ang ilo, tungod kay nahibaluan ko nga may impluwensya ako sa korte,
22 kabay pa nga mautod ang akon butkon.
23 Indi ko mahimo ina nga mga butang kay nahadlok ako sa silot kag sa gahomsang Dios.
24 “Wala ako nagsalig sa akon manggad ukon naghunahuna nga makahatag ini sa akon sang seguridad.
25 Wala ako nagpabugal sa akon madamo nga manggad kag sa tanan nga pagkabutang nga naangkon ko.
26 Wala ako nagsimba sa adlaw nga nagasilak sing masanag, ukon sa bulan nga nagalakat sing matahom.
27 Wala man naganyat sing sekreto ang akon tagipusuon sa pagsimba sini.
28 Kon matuod nga ginhimo ko ini nga mga sala dapat ako silutan, kay nagluib ako sa Dios nga ara sa langit.
29 “Wala ako nagkalipay sang nalaglag ang akon mga kaaway ukon sang nag-abot sa ila ang kalisod.
30 Wala ako nagpakasala paagi sa pagpakamalaot sa ila.
31 Nahibaluan sang akon panimalay nga ginpakaon ko sing maayo ang mga nagbisita sa akon.
32 Wala ko ginpabay-an nga magtulog ang mga dumuluong bisan diin kay permi bukas ang akon puwertahan para sa ila.
33 Wala ko gintago ang akon mga sala pareho sang ginahimo sang iban.
34 Wala ako naghipos-hipos lang ukon nagpakuribong tungod sa kahadlok kon ano ang isiling sang mga tawo.
35 “Kon may magpamati lang kuntani sa akon! Karon, handa ako sa pagpirma sa pagpamatuod nga wala ako sing sala. Kon may iakusar ang Makagagahomnga Diossa akon, ginapangabay ko siya nga ihambal niya sa akon, kon indi gani isulat niya.
36 Kay ikabit ko ini sa akon abaga ukon ibutang sa akon ulo nga daw sa koronasa pagpakita nga handa ako sa pag-atubang sini.
37 Sugiran ko ang Dios sang tanan ko nga ginahimo. Magaatubang ako sa iya pareho sa pangulonga wala nahuya.
38 “Kon ginaabusuhan ko ang akon duta ukon ginkawat ko ini sa iban,
39 ukon ginpalain ko ang buot sang mga nagaobra sa akon duta tungod nga ginkuha ko ang mga patubas nga wala sila pagbayari,
40 kabay pa nga magtubo sa akon duta ang tunukon nga mga kahoy-kahoy kag ang mga hilamon sa baylo sang trigo kag barley.”
Diri natapos ang hambal ni Job.
1 Sang ulihi nag-untat man sa pagsabat kay Job ang tatlo niya ka abyan, tungod kay nag-insister gid si Job nga wala siya sing sala.
2 Karon, may isa ka tawo didto nga ang iya ngalan si Elihu. Anak siya ni Barakel nga taga-Buz nga kaliwat sang pamilya ni Ram. Naakig gid siya kay Job kay wala ginabasol ni Job ang iya kaugalingon kundi ang Dios.
3 Naakig man siya sa tatlo ka abyan ni Job kay indi nila mapamatud-an nga nakasala si Job kag nagaguwa nga ang Dios amo ang may sala.
4 Ginhulat ni Elihu nga makatapos sila tanan sa paghambal antes siya maghambal kay Job, tungod kay mas magulang sila sang sa iya.
5 Pero sang makita niya nga ang tatlo wala na sing ihambal, naakig gid siya.
6 Gani nagsiling siya, “Bata pa ako kag kamo tigulang na, gani natahap ako maghambal. Wala ako nangahas sa paghambal sa inyo sang akon nahibaluan.
7 Naghunahuna ako nga kamo ang dapat magtudlo, kay mga tigulang na kamo kag madamo ang inyo nahibaluan.
8 Pero ang matuod, ang espiritu sang Makagagahomnga Diosnga ara sa tawo amo ang nagahatag sa iya sang pag-intiendi.
9 Ang pagkatigulang indi garantiya nga ang isa ka tawo maalam kag nakahibalo kon ano ang husto.
10 Gani magpamati kamo sa akon. Magahambal man ako sang akon nahibaluan.
11 Naghulat ako samtang nagahunahuna kamo kon ano ang inyo nagakadapat nga ihambal. Nagpamati ako sang inyo mga rason.
12 Ginpamatian ko gid kamo sing maayo, pero wala gid sing isa sa inyo nga nakapamatuod nga nakasala si Job; wala gid kamo makasabat sa iya mga rason.
13 Indi kamo magsiling, ‘Nasapwan namon nga mas maalam siya. Pabay-i nga ang Dios ang magsabat sa iya kag indi ang tawo.’
14 Kon ako ang ginabais ni Job, indi ko siya pagsabton pareho sang inyo panabat.
15 Karon naurungan kamo kag wala na sang isabat.
16 Kinahanglan pa bala nga maghulat ako, karon nga naghipos na kamo kag wala na sing isabat?
17 May ihambal man ako; isugid ko man ang akon nahibaluan.
18 Kay madamo ako sang inughambal, kag daw indi ko na gid ini mapunggan.
19 Pareho ako sa bag-o nga panit nga suludlan sang bino nga daw mabusdik tungod nga indi makasungaw ang bino.
20 Kinahanglan nga maghambal gid ako agod maumpawan ako.
21 Wala ako sing may apinan ukon dayaw-dayawon.
22 Indi ako kahibalo magdayaw-dayaw. Kon himuon ko ini, silutan ako gilayon sangDios nganaghimo sa akon.”
1 “Karon, Job, pamatii sing maayo ang tanan nga ihambal ko sa imo.
2 Handa na gid ako sa paghambal kag ara na sa punta sang akon dila ang akon inughambal.
3 Magahambal ako halin sa akon matarong nga tagipusuon. Ihambal ko sing sinsero ang akon nahibaluan.
4 Ang espiritu sang Makagagahom nga Dios amo ang naghimo sa akon kag naghatag sa akon sang kabuhi.
5 Sabta ako, kon mahimo mo. Ihanda ang imo mga rason kag atubanga ako.
6 Pareho lang ako sa imo sa atubangan sang Dios. Ginporma man ako halin sa duta.
7 Gani indi ka magkahadlok sa akon ukon maghunahuna nga daog-daugon ko ikaw.
8 “Nabatian ko gid ang mga ginpanghambal mo. Nagsiling ka,
9 ‘Wala ako sing sala; matinlo ako kag inosente.
10 Pero ginapangitaan sang Dios sang rason nga iya ako paantuson. Ginakabig niya ako nga iya kaaway.
11 Ginakadenahan niya ang akon mga tiil; ginabantayan niya ang tanan ko nga ginahimo.’
12 “PeroJob,sala ka gid sa imo ginsiling. Indi bala nga ang Dios labaw sang sa tawo?
13 Ti, ngaa ginaakusar mo siya nga wala niya ginasabat ang reklamo sang tawo?
14 Ang matuod, nagahambal permiang Dios, pero wala lang ini matalupangdan sang tawo.
15 Nagahambal siyapaagi sa damgo samtang nagakatulog sing mahamuok ang tawo kon gab-i.
16 Nagahutik siya sa ila dulunggan sa pagpaandam sa ila, kag ini nakapahadlok sa ila.
17 Ginahimo niya iniagod mag-untat ang tawo sa pagpakasala kag pagpabugal,
18 kag agod maluwas siya sa kamatayon.
19 Kon kaisa ginadisiplina sang Dios ang tawo paagi sa balatian nga nagapaantos sa iya pareho sa sige-sige nga palanakit sang tul-an,
20 nga nagapadula sang iya gana sa pagkaon bisan sa pinakamanamit nga pagkaon.
21 Naganiwang siya, kag nagaguluwa na ang iya mga tul-an.
22 Dali na lang siya mapatay kag magkadto sa lugar sang mga patay.
23 “Pero kon may isa lang sa linibo nga mga anghel nga magpatunga sa iyakag sa Dios,kag magpadumdom sa iya kon ano ang husto nga dapat niya himuon,
24 kaluoyan siya sang Dios.Magasiling ang Dios, ‘Luwasa siya sa kamatayon. Nakakita ako sang inugtubos sa iya.’
25 Dayon magabalik ang maayo niya nga lawas. Magabakod siya liwat pareho sang pamatan-on pa siya.
26 Kon magpangamuyo siya sa Dios sabton niya siya. Batunon siya sang Dios sing malipayon, kag ibalik sang Dios sa iya ang iya matarong nga pagkabuhi.
27 Dayon magasugid siya sa mga tawo, ‘Nakasala ako, kag naghimo sang indi husto, pero wala ko mabaton ang silot nga bagay kuntani sa akon.
28 Ginluwas niya ako sa kamatayon, kag padayon ako nga magkabuhi.’
29 “Huo, permi ini ginahimo sang Dios sa tawo.
30 Ginaluwas niya ang tawo sa kamatayon agod mabuhi siya.
31 Job, pamatii ako sing maayo. Maghipos ka lang, kag pabay-i ako sa paghambal.
32 Kon may inughambal ka gid man, maghambal ka, kay gusto ko mahibaluan kon matuod nga wala ka sing sala.
33 Pero kon wala ka sing inughambal, maghipos ka kag magpamati sa akon kaalam.”
1 Dayon nagsiling si Elihu,
2 “Kamo nga nagasiling nga maalamon kamo kag madamo sang nahibaluan, pamatii ninyo ako sing maayo.
3 Kay subong nga ang dila makahibalo kon ano ang manamit kag ang indi manamit nga pagkaon, ang dulunggan makahibalo man kon ano ang husto ukon indi husto nga mga pulong.
4 Gani hibaluon naton kon ano ang husto; tun-an naton kon ano ang maayo.
5 Kay nagsiling si Job, ‘Inosente ako pero wala ako ginhatagan sang Dios sang hustisya.
6 Bisan matarong ako, ginakabig ako nga butigon. Bisan wala ako sing sala nga nahimo, ginhatagan niya ako sang balatian nga wala sing kaayuhan.’
7 “Wala sing tawo nga pareho kay Job nga ginauhaw sa pagtamay.
8 Nanamian siya mag-upod sa malaot kag makasasala nga mga tawo.
9 Kay nagasiling siya, ‘Wala sing makuha ang tawo kon magtinguha siya sa paglipay sa Dios.’
10 Gani magpamati kamo sa akon, kamo nga nagasiling nga nakaintiendi kamo. Ang Makagagahom nga Dios wala nagahimo sing malain.
11 Ginabalusan niya ang tawo suno sa iya binuhatan; ginatratar niya siya suno sa nagakabagay sa iya pamatasan.
12 Imposible nga maghimo ang Makagagahom nga Dios sing malain. Indi niya mahimo nga tikuon ang hustisya.
13 May nagsugo bala sa iya sa pagdumala sa bug-os nga kalibutan?Siyempre wala!
14 Kon pagbuot sang Dios nga kuhaon ang ginhawa nga ginhatag niya sa tawo,
15 magakalamatay ang tanan nga tawo kag magabalik sa duta.
16 “Kon may pag-intiendi ka,Job,pamatii ining akon ihambal:
17 Makadumala bala ang Dios kon indi niya gusto ang hustisya? Ti, ngaa ginapakalain mo ang matarong kag gamhanan nga Dios?
18 Indi bala nga kon malaot kag wala sing pulos ang mga hari kag mga opisyal ginasabdong niya sila?
19 Wala siya sing may ginapasulabi sa mga pangulo, kag wala niya ginapaboran ang mga manggaranon sa mga imol, kay sila tanan pareho niya nga ginhimo.
20 Bisan ang gamhanan nga mga tawo mapatay gulpi sa kagab-ihon, nga wala sing may nagtandog sa ila.
21 Ginabantayan gid sang Dios ang tanan nga ginahimo sang tawo.
22 Wala gid sing madulom nga lugar nga sa diin makapanago ang mga malaot.
23 Indi na kinahanglan nga tawgon pa sang Dios ang tawo nga magkadto sa iya atubangan agod usisaon kag hukman.
24 Indi na kinahanglan nga mag-imbistigar pa siya kon pahalinon na niya ang gamhanan nga mga tawo sa ila posisyon kag buslan sang iban.
25 Tungod nga nahibaluan niya ang ila ginahimo, ginakuhaan niya sila sang gahom kag ginalaglagbisansa kagab-ihon.
26 Ginasilutan niya sila sa atubangan sang mga tawo tungod sang ila kalautan.
27 Ginahimo niya ini tungod kay nag-untat sila sa pagsunod sa iya, kag wala nila ginasapak ang iya mga pamaagi.
28 Ginapigos nila ang mga imol, kag nabatian sang Dios ang ila sini pagpangayo sang bulig.
29 Pero bisan maghipos kag magpanago ang Dios, wala sing may makasiling nga indi husto ang ginahimo niya. Pero ang matuod, nagabantay ang Dios sa mga tawo kag sa mga nasyon,
30 agod matapna niya ang pagdumala sang indi diosnon nga mga tawo nga makahalit sa katawhan.
31 “Job,ngaa indi ka magpalapit sa Dios kag magsiling, ‘Nakasala ako, pero indi na ako magpakasala pa’
32 ukon ‘Ipahayag sa akon ang akon sala. Kon nakasala ako, indi ko na ini paghimuon liwat.’
33 Paano sabton sang Dios ang imo ginapangabay kon indi ka maghinulsol? Ara sa imo ang desisyon, indi sa akon. Gani sugiri ako kon ano ang masiling mo.
34 Ang mga tawo nga maalamon kag may pag-intiendi, nga nagapamati sa akon,
35 makasiling man nga ang imo ginahambal, Job, wala sing kaalam kag wala sing pulos.
36 Dapat tilawan ka gid man sing tudo tungod nga nagahambal ka pareho sa malaot nga tawo.
37 Gindugangan mo pa ang imo sala paagi sa pagrebelde sa Dios. Ginatamay kag ginainsulto mo ang Dios sa amon atubangan.”