Category: 1 Cronica

Ginsensos ni David ang Iya mga Soldado

1 Ginkontra ni Satanasang Israel, gani ginsugyot niya si David nga isensos ang mga Israelinhon.

2 Gani nagsiling si David kay Joab kag sa mga kumander sang mga soldado, “Lakat kamo, kag isipa ninyo ang mga Israelinhon halin sa Beersheba hasta sa Dan.Dayon magbalik kamo diri agod mahibaluan ko kon pila sila tanan.”

3 Pero nagsabat si Joab, “Kabay pa nga padamuon sangGinooang imo katawhan sing 100 ka pilo. Pero, Mahal nga Hari, ngaa nga gusto mo himuon ini nga butang? Indi bala nga mga sakop mo sila? Ti, ngaa dalahigon mo sila sa imo sala nga himuon?”

4 Pero nag-insister gid si David, gani ginlibot ni Joab ang bug-os nga Israel, kag dayon nagbalik sa Jerusalem.

5 Ginsugid niya kay David ang kadamuon sang mga lalaki nga makasarang magpakig-away: 1,100,000 sa Israel kag 470,000 sa Juda.

6 Pero wala pag-ilakip ni Joab sa pag-isip ang tribo ni Levi kag ni Benjamin tungod kay naugot siya sa sugo sang hari.

7 Wala man malipay ang Dios sa sining sugoni David, gani ginsilutan niya ang Israel.

8 Dayon nagsiling si David sa Dios, “Nakasala gid ako sa akon ginhimo. Gani nagapakitluoy ako sa imo,Ginoo, nga patawaron mo ako nga imo alagad sa akon sala, kay kabuangan gid ang akon ginhimo.”

9 Nagsiling angGinookay Gad nga propeta ni David,

10 “Magkadto ka kay David kag papilia siya kon sa diin sa tatlo ka silot ang gusto niya nga himuon ko sa iya.”

11 Gani nagkadto si Gad kay David kag nagsiling sa iya, “Diin sa sini ang gusto mo:

12 Tatlo ka tuig nga gutom, tatlo ka bulan nga pagpanglaglag sa inyo sang inyo mga kaaway, ukon tatlo ka adlaw nga kalalat-an halin saGinoopaagi sa pagpanghalit sang anghel sangGinoosa bug-os nga duta sang Israel. Magdesisyon ka kag pahibalua ako kon ano ang isabat ko saGinoonganagpadala sa akon.”

13 Nagsabat si David kay Gad, “Nabudlayan gid ako magpili. Maayo pa nga angGinoona lang ang magsilot sa akon sang sa mga tawo, kay maluluy-on gid angGinoo.”

14 Gani nagpadala angGinoosang kalalat-an sa Israel, kag 70,000 ka Israelinhon ang napatay.

15 Dayon nagpadala ang Dios sang anghel sa paglaglag sang Jerusalem. Pero samtang ginalaglag sang anghel ang Jerusalem, nagbaylo ang hunahuna sangGinoosa pagsilot sa mga tawo. Gani nagsiling siya sa anghel nga nagapanglaglag sa mga tawo, “Tama na! Indi na sila pagsiluti.” Sadto nga tion didto nagatindog ang anghel sangGinoosa may linasan ni Araunanga Jebusnon.

16 Nagtangla si David kag nakita niya ang anghel sangGinoonga nagatindog sa kahanginan, sa tunga-tunga sang langit kag duta nga may ginauyatan nga espada nga nagatudlo sa Jerusalem. Dayon nagluhod si David kag ang mga manugdumalasang Israel, nga nagasuksok sang sakosa pagpakita sang ila pagpangasubo.

17 Nagsiling si David sa Dios, “Ako ang nagsugo nga isensos ang mga tawo. Ako ang nakasala. Ini nga mga tawomga inosentepareho sa mga karnero. Wala sila sang may nahimo nga sala. OGinoonga akon Dios, ako na lang kag ang akon pamilya ang siluti. Indi pagpaantusa ang imo katawhan sa sini nga kalalat-an.”

18 Dayon ginsugo sang anghel sangGinoosi Gad sa pagsiling kay David nga magtaklad siya sa linasan ni Arauna nga Jebusnon kag maghimo didto sang halaran para saGinoo.

19 Gani nagtaklad si David suno sa ginsugo sangGinoopaagi kay Gad.

20 Sadto nga tion nagalinas si Arauna kag ang iya apat ka anak nga lalaki sang trigo. Kag sang makita nila ang anghel sangGinoo, nagdalagan ang apat ka anak ni Arauna kag nagpanago.

21 Dayon nakita ni Arauna nga nagapadulong si David. Gani naghalin siya sa linasan kag nagluhod sa atubangan ni Davidbilang pagtahod sa iya.

22 Nagsiling si David sa iya, “Ibaligya sa akon ang imo linasan kay mapatindog ako sang halaran para saGinoo, agod mauntat na ang kalalat-an sa mga tawo. Bayaran ko ikaw kon pila gid ang iya bili.”

23 Nagsiling si Arauna kay David, “Sige, kuhaa, Mahal nga Hari. Himua kon ano ang maayo sa imo. Hatagan ko pa ikaw sang baka para ihalad bilang halad nga ginasunog, mga tapi nga ginagamit sa paglinas para igatong, kag trigo para ihalad bilang halad nga regalo. Huo, ihatag ko ini tanan sa imonga libre.”

24 Pero nagsabat si Haring David kay Arauna, “Indi ko ini pagbatunon nga libre. Bayaran ko ikaw kon pila ang bili sini. Indi ko mahimo nga kuhaon lang ini sa imo kag ihalad saGinoo. Indi ako maghalad sang halad nga ginasunog nga wala sing bili sa akon.”

25 Gani ginbayaran ni David si Arauna sang 600 ka bilognga bulawan para sa sadto nga lugar.

26 Dayon naghimo siya didto sang halaran para saGinookag naghalad sang mga halad nga ginasunog kag mga halad nga para sa maayo nga relasyon. Kag dayon nagpangamuyo siya. Ginsabat siya sangGinoopaagi sa pagpadala sang kalayo halin sa langit sapagsunog sangmga halad sa halaran.

27 Dayon nagsiling angGinoosa anghel nga ibalik niya ang iya espada sa tagub.

28 Sang nakita ni David nga ginsabat sangGinooang iya pangamuyo, naghaladpa gidsiya sang mga halad didto sa linasan ni Arauna nga Jebusnon.

29 Sadto nga tion, ang Tolda sangGinookag ang halaran para sa mga halad nga ginasunog nga ginpahimo ni Moises sa kamingawan ara sa mataas nga lugar sa Gibeon.

30 Pero indi magkadto didto si David sa pagpamangkot sa Dios, tungod nahadlok siya sa espada sang anghel sangGinoo.

1 Dayon nagsiling si David, “Diri na nga lugar ibutang ang templo sangGinoongDios kag ang halaran sang mga halad nga ginasunog sang Israel.”

Ang Pagpreparar para sa Pagpatindog sang Templo

2 Nagmando si David sa pagtipon sang mga indi Israelinhon nga nagaestar sa Israel, kag nagpili siya sa ila sang mga manugbasbas sang mga bato para sa templo sang Dios.

3 Naghatag si David sang madamo gid nga mga salsalon para himuon nga mga lansang kag mga bisagra para sa mga puwertahan, kag madamo gid nga mga saway nga indi na makilo sa kabug-at.

4 Naghatag man siya sang mga kahoy nga sedro nga indi maisip ang kadamuon. Ini nga mga kahoy gindala sa iya sang mga taga-Sidon kag mga taga-Tyre.

5 Nagsiling si David, “Bataon pa ang akon anak nga si Solomon kag wala pa siya sing eksperiensya. Kinahanglan nga ang templo sangGinoonga patindugon matahom gid kag bantog sa bug-os nga kalibutan. Gani preparahan ko gid ini subong.” Gani puwerte gid ang pagpreparar ni David sa wala pa siya mapatay.

6 Dayon ginpatawag ni David ang iya anak nga si Solomon kag ginsugo sa pagpatindog sang templo para saGinoo, ang Dios sang Israel.

7 Nagsiling si David kay Solomon, “Anak, gusto ko kuntani nga magpatindog sang templo para sa kadungganan sangGinoonga akon Dios.

8 Pero amo ini ang iya ginsiling sa akon: ‘Madamo nga mga tawo ang imo napatay sa puwerte nga mga inaway nga imo naagihan. Gani indi ko ikaw pagtugutan sa pagpatindog sang templo para sa akon kadungganan.

9 Pero hatagan ko ikaw sang anak nga lalaki nga magahari nga may kalinong tungod nga indi siya pagdisturbuhon sang tanan niya nga kaaway sa palibot. Ngalanan siya nga Solomon,kay hatagan ko gid sang kalinong ang Israel sa iya paghari.

10 Siya amo ang magapatindog sang templo para sa akon kadungganan. Kabigon ko siya nga akon anak kag ako mangin iya amay. Ang iya mga kaliwat magahari sa Israel hasta san-o.’

11 “Gani anak, kabay pa nga updan ka sangGinookag magmadinalag-on ka sa pagpatindog sang templo sangGinoonga imo Dios, suno sa iya ginsiling nga himuon mo.

12 Kabay pa nga hatagan ka sangGinoonga imo Dios sang kaalam kag pag-intiendi agod matuman mo ang iya kasuguan sa tion nga padumalahon ka na niya sa bug-os nga Israel.

13 Kag kon matuman mo sing maayo ang mga sugo kag mga pagsulundan nga ginhatag niya sa Israel paagi kay Moises, mangin madinalag-on ka. Gani magpakabakod ka kag magpakaisog. Indi ka magkahadlok ukon magkaluya.

14 Ginpangabudlayan ko gid ang pagpreparar sang mga materyales para sa pagpatindog sang templo sangGinoo—3,500 ka tonelada nga bulawan, 35,000 ka tonelada nga pilak, kag madamo gid nga mga saway kag mga salsalon nga indi na makilo sa kabug-at. Nagpreparar man ako sang mga kahoy kag mga bato, pero kinahanglan mo pa ini dugangan.

15 May madamo ka nga manug-obra: mga manugbasbas sang bato, mga mason, mga panday, kag madamo gid nga mga tawo nga may abilidad sa bisan ano nga obra,

16 sa bulawan, pilak, saway, kag salsalon. Karon, umpisahi na ang pagpaobra, kag kabay pa nga updan ka sangGinoo.”

17 Dayon ginmanduan ni David ang tanan nga pangulo sang Israel sa pagbulig kay Solomon nga iya anak.

18 Nagsiling siya sa ila, “Kaupod ninyo angGinoonga inyo Dios kag ginhatagan niya kamo sang kalinong sainyo mga kaaway sapalibot. Kay gintugyan niya sa akon ang tanan nga pumuluyo sang sini nga duta, kag karon iya na ini sangGinookag sakop na ini naton nga iya katawhan.

19 Gani karon magdangop kamo saGinoonga inyo Dios sa bug-os ninyo nga tagipusuon kag kalag. Umpisahi na ninyo ang pagpatindog sang templo sangGinoongDios agod mabutang na ninyo ang Kahon sang Kasugtanan sangGinookag ang balaan nga mga kagamitan sang Dios sa sina nga templo nga patindugon para sa iya kadungganan.”

Ang Obra sang mga Levita

1 Sang tigulang na gid si David, ginhimo niya nga hari sang Israel ang iya anak nga si Solomon.

2 Ginpatipon niya ang tanan nga pangulo sang Israel, pati ang mga pari kag mga Levita.

3 Gin-isip ang mga Levita nga nagaedad 30 paibabaw, kag ang ila kadamuon 38,000.

4 Nagsiling si David, “Ang 24,000 sa ila magadumala sang mga buluhaton sa templo sangGinoo, ang 6,000 magaalagad bilang mga opisyal kag mga hukom,

5 ang 4,000 magaalagad bilang mga guwardya sang mga puwertahansang templo, kag ang 4,000 pa gid magadayaw saGinoopaagi sa mga instrumento nga ginpahimo ko para sa sini nga buluhaton.”

6 Ginpartida ni David sa tatlo ka grupo ang mga Levita, suno sa mga pamilya sang mga anak ni Levi nga sila ni Gershon, Kohat, kag Merari.

Ang mga Kaliwat ni Gershon

7 Ang mga anak ni Gershon amo si Ladankag si Shimei.

8 Si Ladan may tatlo ka anak nga lalaki nga sila ni Jehiel, ang pinakapangulosang ila pamilya, dayon si Zetam kag si Joel.

9 Amo ini sila ang mga pangulo sang mga pamilya ni Ladan.

Si Shimei may tatlo man ka anak nga lalaki nga sila ni Shelomot, Haziel, kag Haran.

10-11 Sang ulihi may apat pa ka anak nga lalaki si Shimei nga sila ni Jahat, ang pinakapangulosang ila pamilya, si Zinaang ikaduha, dayon si Jeush kag si Beria. Diutay lang ang mga anak ni Jeush kag Beria, gani gin-isip sila nga isa lang ka pamilya.

Ang mga Kaliwat ni Kohat

12 Si Kohat may apat ka anak nga lalaki nga sila ni Amram, Izhar, Hebron, kag Uziel.

13 Ang mga anak nga lalaki ni Amram amo si Aaron kag si Moises. Ginseparar si Aaron kag ang iya mga kaliwat sa pagdedikar sang labing balaan nga mga butang, sa paghalad sang mga halad saGinoo, sa pag-alagad sa iya, kag sa pagbendisyonsa katawhansa iya ngalan.Amo ini ang ila katungdananhasta san-o.

14 Ang mga anak nga lalaki ni Moises nga alagad sang Dios nalakip sa mga Levita.

15 Ang iya mga anak nga lalaki amo si Gershom kag si Eliezer.

16 Ang isa sa mga anak nga lalaki ni Gershom amo si Shebuelnga pinakapangulosang ila pamilya.

17 Si Eliezer may isa lang ka anak nga lalaki nga amo si Rehabia nga pinakapangulosang ila pamilya. Madamo gid ang mga kaliwat ni Rehabia.

18 Ang isa sa mga anak nga lalaki ni Izhar amo si Shelomit nga pinakapangulosang ila pamilya.

19 Ang mga anak nga lalaki ni Hebron amo sila ni Jeria, ang pinakapangulosang ila pamilya, si Amaria ang ikaduha, si Jahaziel ang ikatatlo, kag si Jekameam ang ikaapat.

20 Ang mga anak nga lalaki ni Uziel amo si Micas, ang pinakapangulosang ila pamilya, kag si Ishia ang ikaduha.

Ang mga Kaliwat ni Merari

21 Ang mga anak nga lalaki ni Merari amo si Mali kag si Mushi. Ang mga anak nga lalaki ni Mali amo si Eleazar kag si Kish.

22 Napatay si Eleazar nga wala gid sang anak nga lalaki kundi mga babayi lang. Ini sila ginpangasawa sang ila mga pakaisa nga mga anak ni Kish.

23 Si Mushi may tatlo ka anak nga lalaki nga sila ni Mali, Eder, kag Jeremot.

24 Amo ini sila ang mga kaliwat ni Levi suno sa mga pangulo sang ila mga pamilya. Nalista ang tagsa nila ka ngalan. Ang kada isa sa ila dapat nagaedad 20 ka tuig paibabaw agod makaalagad sa templo sangGinoo.

25 Nagsiling si David, “Ginhatagan kita sangGinoo, ang Dios sang Israel, sang kalinong kag magaestar siya sa Jerusalem hasta san-o.

26 Karon, indi na kinahanglan sang mga Levita nga magdala-dala pa sang Tolda nga Simbahan kag sang mga kagamitan sini.”

27 Suno sa katapusan nga sugo ni David, ang tanan nga Levita nga nagaedad 20 ka tuig paibabaw ginlista para mag-alagad.

28 Ang katungdanan sang mga Levita amo ang pagbulig sa mgapari nga mgakaliwat ni Aaron sa pag-alagad sa templo sangGinoo. Sila ang magaatipan sang mga lagwerta sang templo kag sang mga kuwarto sa kilid, kag sila man ang magabulig sa mga seremonya sang pagpakatinlo kag sang iban pa nga buluhaton sa templo sang Dios.

29 Sila man ang gintugyanan sabalaan ngatinapay nga ginaplastar sa lamisa, sa harina para sa mga halad nga regalo, sa tinapay nga wala sing inugpahabok, kag sa iban pa nga ginaluto kag ginamiksla. Sila man ang gintugyanan sa pagkilo kag sa pagtakos sang tanannga halad.

30 Ila man katungdanan ang pagtindog kada aga kag kada gab-isa templosa pagpasalamat kag sa pagdayaw saGinoo.

31 Sila man ang magabulig sa paghalad saGinoosang mga halad nga ginasunog sa mga Adlaw nga Inugpahuway, sa Piesta sang Pag-umpisa sang Bulan, kag sa iban pa nga mga piesta. May mga pagsulundan kon pila ka Levita ang magahimo sini nga buluhaton kag kon paano nila ini himuon.

32 Gani ginhimo sang mga Levita ang ila katungdanan sa pag-atipan sang Tolda nga Ginapakigkitaan kag sa Balaan nga Lugar, kag sa pagbulig sa ila mga paryente nga mga pari nga kaliwat ni Aaron sa pag-alagad sa templo sangGinoo.

Ang mga Buluhaton sang mga Pari

1 Amo ini ang mga grupo sang mga kaliwat ni Aaron:

Ang mga anak nga lalaki ni Aaron amo sila ni Nadab, Abihu, Eleazar, kag Itamar.

2 Pero una nga napatay si Nadab kag Abihu sang sa ila amay, kag wala sila sang mga anak; gani ang nag-alagad bilang mga pari amo si Eleazar kag si Itamar.

3 Sa bulig ni Zadok nga kaliwat ni Eleazar, kag ni Ahimelec nga kaliwat ni Itamar, gin-grupo niHaringDavid ang mga kaliwat ni Aaron suno sa ila katungdanan.

4 Ang mga kaliwat ni Eleazar gintunga sa 16 ka grupo kag ang mga kaliwat ni Itamar sa 8 ka grupo, kay mas madamo ang mga pangulo sang pamilya sa mga kaliwat ni Eleazar.

5 Ang tanan nga buluhaton ginpartida sa mga grupo paagi sa paggabot-gabot agod wala sing may pinilian. Gani may mga opisyal sang templo nga nagaalagad sa Dios halin sa mga kaliwat ni Eleazar kag sa mga kaliwat ni Itamar.

6 Si Shemaya nga anak ni Netanel nga Levita amo ang sekretaryo. Ginlista niya ang mga ngalan sang mga pari sa atubangan sang hari kag sang mga opisyal nga sila ni Zadok nga pari, Ahimelec nga anak ni Abiatar, kag mga pangulo sang mga pamilya sang mga pari kag sang mga Levita. Naggabot-gabot sing bulos-bulos ang mga kaliwat ni Eleazar kag ni Itamar.

7 Ang una nga nagabutan amo si Jehoyarib,

ang ikaduha si Jedaya,

8 ang ikatlo si Harim,

ang ikaapat si Seorim,

9 ang ikalima si Malkia,

ang ikaanom si Miamin,

10 ang ikapito si Hakoz,

ang ikawalo si Abia,

11 ang ikasiyam si Jeshua,

ang ikanapulo si Shecania,

12 ang ika-11 si Eliashib,

ang ika-12 si Jakim,

13 ang ika-13 si Hupa,

ang ika-14 si Jeshebeab,

14 ang ika-15 si Bilga,

ang ika-16 si Imer,

15 ang ika-17 si Hezir,

ang ika-18 si Hapizez,

16 ang ika-19 si Petahia,

ang ika-20 si Jehezkel,

17 ang ika-21 si Jakin,

ang ika-22 si Gamul,

18 ang ika-23 si Delaya,

kag ang ika-24 si Maazia.

19 Ini sila naghimo sang ila mga katungdanan sa templo sangGinoosuno sa pagsulundan nga ginhatag sang ila katigulangan nga si Aaron halin saGinoo, ang Dios sang Israel.

Ang mga Pangulo sang mga Pamilya sang mga Levita

20 Amo ini ang mga pangulo sang mga pamilya sang iban pa nga mga kaliwat ni Levi:

Halin sa mga kaliwat ni Amram: si Shebuel.

Halin sa mga kaliwat ni Shebuel: si Jedea.

21 Halin sa mga kaliwat ni Rehabia: si Ishia, ang pinakapangulosang ila pamilya.

22 Halin sa mga kaliwat ni Izhar: si Shelomot.

Halin sa mga kaliwat ni Shelomot: si Jahat.

23 Halin sa mga kaliwat ni Hebron: si Jeria, ang pinakapangulosang ila pamilya, si Amaria ang ikaduha, si Jahaziel ang ikatatlo, kag si Jekameam ang ikaapat.

24 Halin sa mga kaliwat ni Uziel: si Micas.

Halin sa mga kaliwat ni Micas: si Shamir.

25 Halin sa mga kaliwat ni Ishia nga utod ni Micas: si Zacarias.

26 Halin sa mga kaliwat ni Merari: si Mali kag si Mushi.

Halin sa mga kaliwat ni Jaazia: si Beno.

27 Halin sa mga kaliwat ni Merari paagi kay Jaazia: si Beno, Shoham, Zacur, kag Ibri.

28 Halin sa mga kaliwat ni Mali: si Eleazar, nga wala sing mga anak nga lalaki.

29 Halin sa mga kaliwat ni Kish: si Jerameel.

30 Halin sa mga kaliwat ni Mushi: si Mali, Eder, kag Jerimot.

Amo ini ang mga Levita suno sa ila mga pamilya.

31 Pareho sang ginhimo sang mga kaliwat ni Aaron, naggabot-gabot man sila sa paghibalo sang ila mga katungdanan, pamatan-on man ukon tigulang. Ginhimo nila ini sa atubangan ni Haring David, Zadok, Ahimelec, kag sang mga pangulo sang mga pamilya sang mga pari kag mga Levita.

Ang mga Musikero

1 Nagpili si David kag ang mga kumander sang mga soldado sang mga tawo halin sa mga anak ni Asaf, Heman, kag Jedutun.Ginpili silasa pagsugid sang mensahi sang Dios nga ginatukaran sang mga arpa, lira, kag mga simbals. Amo ini ang lista sang ila mga ngalan kag mga obra:

2 Halin sa mga anak nga lalaki ni Asaf: si Zacur, Jose, Netania, kag Asarela. Nag-obra sila sa idalom sang pagdumala sang ila amay nga si Asaf. Nagasugid si Asaf sang mensahi sang Dios kon magsugo ang hari.

3 Halin sa mga anak nga lalaki ni Jedutun: si Gedalia, Zeri, Jeshaya, Shimei,Hashabia, kag Mattitia, anomsila tanan.Nag-obra man sila sa idalom sang pagdumala sang ila amay nga si Jedutun. Ining si Jedutun nagasugid sang mensahi sang Dios nga ginatukaran sang arpa, nga may pagpasalamat kag pagdayaw saGinoo.

4 Halin sa mga anak nga lalaki ni Heman: si Bukia, Matania, Uziel, Shebuel,Jerimot, Hanania, Hanani, Eliata, Gidalti, Romamti Ezer, Joshbekasha, Maloti, Hotir, kag Mahaziot.

5 Sila tanan mga anak ni Heman nga propeta sang hari. Ginpadunggan siya sang Dios paagi sa paghatag sa iya sang 14 ka anak nga lalaki kag tatlo ka babayi, suno sa promisa sang Dios sa iya.

6 Ini tanan nga mga lalaki ginadumalahan sang ila amay sa ila nga pagtukar sang mga simbals, lira, kag mga arpa sa ila pag-alagad sa balay sang Dios. Si Asaf, Jedutun, kag Heman ginadumalahan sang hari.

7 Sila kag ang ila mga paryente, nga 288 tanan, mga maayo gid nga mga musikero para saGinoo.

8 Naggabot-gabot sila agod mahibaluan ang tagsa nila ka responsibilidad, pamatan-on man ukon tigulang, manunudlo man ukon estudyante.

9 Ang una nga nagabutan sa pamilya ni Asaf amo si Jose kag ang iya mga anak nga lalaki kag mga paryente;dose sila tanan.

Ang ikaduha amo si Gedalia kag ang iya mga anak kag mga paryente; dose man sila.

10 Ang ikatatlo amo si Zacur kag ang iya mga anak kag mga paryente; dose man sila.

11 Ang ikaapat amo si Izrikag ang iya mga anak kag mga paryente; dose man sila.

12 Ang ikalima amo si Netania kag ang iya mga anak kag mga paryente; dose man sila.

13 Ang ikaanom amo si Bukia kag ang iya mga anak kag mga paryente; dose man sila.

14 Ang ikapito amo si Jesarelakag ang iya mga anak kag mga paryente; dose man sila.

15 Ang ikawalo amo si Jeshaya kag ang iya mga anak kag mga paryente; dose man sila.

16 Ang ikasiyam amo si Matania kag ang iya mga anak kag mga paryente; dose man sila.

17 Ang ikanapulo amo si Shimei kag ang iya mga anak kag mga paryente; dose man sila.

18 Ang ika-11 amo si Azarelkag ang iya mga anak kag mga paryente; dose man sila.

19 Ang ika-12 amo si Hashabia kag ang iya mga anak kag mga paryente; dose man sila.

20 Ang ika-13 amo si Shebuelkag ang iya mga anak kag mga paryente; dose man sila.

21 Ang ika-14 amo si Matitia kag ang iya mga anak kag mga paryente; dose man sila.

22 Ang ika-15 amo si Jerimotkag ang iya mga anak kag mga paryente; dose man sila.

23 Ang ika-16 amo si Hanania kag ang iya mga anak kag mga paryente; dose man sila.

24 Ang ika-17 amo si Joshbekasha kag ang iya mga anak kag mga paryente; dose man sila.

25 Ang ika-18 amo si Hanani kag ang iya mga anak kag mga paryente; dose man sila.

26 Ang ika-19 amo si Maloti kag ang iya mga anak kag mga paryente; dose man sila.

27 Ang ika-20 amo si Eliata kag ang iya mga anak kag mga paryente; dose man sila.

28 Ang ika-21 amo si Hotir kag ang iya mga anak kag mga paryente; dose man sila.

29 Ang ika-22 amo si Gidaltikag ang iya mga anak kag mga paryente; dose man sila.

30 Ang ika-23 amo si Mahaziot kag ang iya mga anak kag mga paryente; dose man sila.

31 Ang ika-24 amo si Romamti Ezer kag ang iya mga anak kag mga paryente; dose man sila.

Ang mga Guwardya sang mga Puwertahan sang Templo

1 Amo ini ang mga grupo sang mga guwardya sang mga puwertahansang templo:

Halin sa pamilya ni Kora, si Meshelemia nga anak ni Kore nga miyembro sang pamilya ni Asaf,

2 kag ang pito niya ka anak nga lalaki nga sila ni Zacarias, ang kamagulangan, dayon si Jediel, Zebadia, Jatniel,

3 Elam, Jehohanan, kag Eliehoenai.

4 Kaupod mansi Obed Edom kag ang walo niya ka anak nga lalaki nga sila ni Shemaya, ang kamagulangan, dayon si Jehozabad, Joa, Sacar, Netanel,

5 Amiel, Isacar, kag Peuletai. Ginpakamaayo sang Dios si Obed Edom.

6 Ang kamagulangan nga anak ni Obed Edom nga si Shemaya may mga anak nga lalaki nga mga pangulo sang mga pamilya, tungod kay may mga abilidad sila.

7 Sila amo si Otni, Refael, Obed, kag Elzabad. Ang ila paryente nga si Elihu kag si Semakia may mga abilidad man.

8 Sila tanan ang mga kaliwat ni Obed Edom. Sila kag ang ila mga anak kag mga paryente may ikasarang kag abilidad sa pag-obra.Ang ila kadamuon,62 tanan.

9 Ang 18 ka mga anak kag mga paryente ni Meshelemia may mga abilidad man.

10 Si Hosa nga halin sa pamilya ni Merari may mga anak man. Ginhimo ni Hosa si Shimri nga pinakapangulosang ila pamilyabisan indi siya ang iya kamagulangan nga anak.

11 Ang ikaduha kay Shimri amo si Hilkia, ang ikatatlo si Tebalia, kag ang ikaapat si Zacarias. 13 tanan ang mga anak kag mga paryente ni Hosanga mga guwardya sa puwertahan sang templo.

12 Gin-grupo ang mga guwardya sang mga puwertahansang templosuno sa pangulo sang ila pamilya, kag may mga katungdanan sila sa pag-alagad sa templo sangGinoo, pareho sang ila kaparehonga mga Levita.

13 Naggabot-gabot sila kon sa diin nga puwertahan ang pagaguwardyahan sang ila mga pamilya, pamatan-on man ukon tigulang.

14 Ang sa sidlangan nga puwertahan nagabutan ni Shelemia,kag ang sa aminhan nga puwertahan nagabutan sang iya anak nga si Zacarias. Ining si Zacarias maalam nga manuglaygay.

15 Ang sa bagatnan nga puwertahan nagabutan ni Obed Edom, kag ang iya mga anak gintugyanan sang mga bodega.

16 Ang sa nakatundan nga puwertahan kag ang puwertahan sang alagyan pataklad sa templonagabutan ni Shupim kag ni Hosa.

May turno sila sa pagbantay:

17 Sa sidlangan anom ka guwardya ang nagabantay kada adlaw, sa aminhan apat, sa bagatnan apat, kag sa kada bodega tag-duha.

18 Sa nakatundan apat ang nagabantay sa alagyan pataklad sa templo kag duha ang nagabantay sa lagwerta.

19 Amo ina sila ang grupo sang mga guwardya sang mga puwertahansang templonga mga kaliwat ni Kora kag Merari.

Ang mga Tresurero kag ang Iban pa nga mga Opisyal

20 Ang iban nga Levitaamo ang gintugyanan sang mga bodega sang templo sang Dios, lakip na ang mga bodega sang mga butang nga ginhalad sa Dios.

21 Si Ladan kaliwat ni Gershon kag amay ni Jehieli. Ang iban sa mga kaliwat ni Ladan mga pangulomansang ila kaliwat.

22 Ang mga anak ni Jehieli nga si Zetam kag si Joel amo ang gintugyanan sang mga bodega sang templo sangGinoo.

23 Amo ini ang mga opisyal ngahalin sa mga kaliwat ni Amram, Izhar, Hebron, kag Uziel:

Halin sa mga kaliwat ni Amram:

24 si Shebuel,nga kaliwat ni Gershom nga anak ni Moises, amo ang pangulo nga opisyal sang mga bodega sang templo.

25 Ang iya mga paryente nga mga kaliwat ni Eliezer amo sila ni Rehabia, Jeshaya, Joram, Zicri, kag Shelomit.

26 Si Shelomit kag ang iya mga paryente amo ang gintugyanan sang tanan nga bodega sang mga ginhalad ni Haring David, sang mga pangulo sang mga pamilya, sang mga kumander sang mga linibo kag mga ginatos nga mga soldado, kag sang iban pa nga mga kumander.

27 Ginhalad nila ang iban nga nakuha nila sa inaway para gamiton sa templo sangGinoo.

28 Si Shelomit man kag ang iya mga paryente ang nagaasikaso sang tanan nga ginhalad ni Propeta Samuel, ni Saul nga anak ni Kish, ni Abner nga anak ni Ner, kag ni Joab nga anak ni Zeruya. Ang iban pa nga mga ginhalad gin-asikaso man nila.

29 Halin sa mga kaliwat ni Izhar: si Kenania kag ang iya mga anak nga lalaki, nga mga administrador kag mga manughukom sa Israel. Wala sila nagatrabaho sa templo.

30 Halin sa mga kaliwat ni Hebron: si Hashabia kag ang 1,700 niya nga mga paryente nga may mga abilidad. Gintugyanan sila sa pagdumala sang mga kadutaan sa nakatundan sangSuba sangJordan. Sila ang nagaasikaso sang mga buluhaton sangGinookag sang hari sa sina nga lugar.

31 Si Jeria ang pangulo sang mga kaliwat ni Hebron suno sa listahan sang ila mga pamilya. (Sang ika-40 nga tuig sang paghari ni David, gin-usisa ang mga listahan, kag natukiban nga may mga kaliwat si Hebron sa Jazer nga sakop sang Gilead, kag ini sila may mga abilidad.)

32 Si Jeria may 2,700 ka paryente nga may mga abilidad kag mga pangulo sang mga pamilya. Sila ang ginpadumala ni Haring David sa mga kaliwat ni Reuben, Gad, kag sa katunga nga tribo ni Manase. Kag sila ang nagaasikaso sang tanan nga buluhaton sang Dios kag sang hari sa sina nga mga lugar.

Ang mga Opisyal sang mga Soldado

1 Amo ini ang lista sang mga pangulo, mga kumander, kag mga opisyal sang mga Israelinhon nga nagaalagad sa hari bilang mga manugdumala sang grupo sang mga soldado nga nagaalagad sing isa ka bulan kada tuig. Ang kada grupo may 24,000ka soldado.

2 Si Jashobeam nga anak ni Zabdiel amo ang kumander sang mga soldado sa nahauna nga bulan. May 24,000ka soldadosa iya grupo.

3 Kaliwat siya ni Perez kag pangulo sang tanan nga opisyal sang mga soldado sa nahauna nga bulan.

4 Si Dodai nga kaliwat ni Ahoa amo ang kumander sang mga soldado sa ikaduha nga bulan. May 24,000ka soldadosa iya grupo. Si Miklot amo ang pinakamataas niya nga opisyal sa iya grupo.

5 Si Benaya nga anak ni Jehoyada nga pari amo ang kumander sang mga soldado sa ikatatlo nga bulan. May 24,000ka soldadosa iya grupo.

6 Ining si Benaya amo ang maisog nga lider sang 30ka maisog nga mga tinawo ni David. Ang iya anak nga si Amizabad amo ang pinakamataas niya nga opisyal sa iya grupo.

7 Si Asahel nga utod ni Joab amo ang kumander sang mga soldado sa ikaapat nga bulan. Ang iya anak nga si Zebadia amo ang nagbulos sa iya. May 24,000ka soldadosa iya grupo.

8 Si Shamhutnga kaliwat ni Izra amo ang kumander sang mga soldado sa ikalima nga bulan. May 24,000ka soldadosa iya grupo.

9 Si Ira nga anak ni Ikesh nga taga-Tekoa amo ang kumander sang mga soldado sa ikaanom nga bulan. May 24,000ka soldadosa iya grupo.

10 Si Helez nga taga-Pelon nga kaliwat ni Efraim amo ang kumander sang mga soldado sa ikapito nga bulan. May 24,000ka soldadosa iya grupo.

11 Si Sibecai nga taga-Husha nga kaliwat ni Zera amo ang kumander sang mga soldado sa ikawalo nga bulan. May 24,000ka soldadosa iya grupo.

12 Si Abiezer nga taga-Anatot nga kaliwat ni Benjamin amo ang kumander sang mga soldado sa ikasiyam nga bulan. May 24,000ka soldadosa iya grupo.

13 Si Maharai nga taga-Netofa nga kaliwat ni Zera amo ang kumander sang mga soldado sa ikanapulo nga bulan. May 24,000ka soldadosa iya grupo.

14 Si Benaya nga taga-Piraton nga kaliwat ni Efraim amo ang kumander sang mga soldado sa ika-11 nga bulan. May 24,000ka soldadosa iya grupo.

15 Si Heldainga taga-Netofa nga kaliwat ni Otniel amo ang kumander sang mga soldado sa ika-12 nga bulan. May 24,000ka soldadosa iya grupo.

Ang mga Opisyal sang mga Tribo sang Israel

16 Amo ini ang mga opisyal sang mga tribo sang Israel:

Sa tribo ni Reuben: si Eliezer nga anak ni Zicri.

Sa tribo ni Simeon: si Shefatia nga anak ni Maaca.

17 Sa tribo ni Levi: si Hashabia nga anak ni Kemuel.

Sa kaliwat ni Aaron: si Zadok.

18 Sa tribo ni Juda: si Elihu nga utod ni David.

Sa tribo ni Isacar: si Omri nga anak ni Micael.

19 Sa tribo ni Zebulun: si Ishmaya nga anak ni Obadias.

Sa tribo ni Naftali: si Jeremot nga anak ni Azriel.

20 Sa tribo ni Efraim: si Hoseas nga anak ni Azazia.

Sa katunga nga tribo ni Manase: si Joel nga anak ni Pedaya.

21 Sa katunga pa gid nga tribo ni Manase sa Gilead: si Iddo nga anak ni Zacarias.

Sa tribo ni Benjamin: si Jaasiel nga anak ni Abner.

22 Sa tribo ni Dan: si Azarel nga anak ni Jeroham.

Sila ang mga opisyal sa mga tribo sang Israel.

23 Sang ginsensos ni David ang mga tawo, wala niya ginlakip ang mga wala pa nagaedad sing 20 ka tuig, tungod nagpromisa angGinoonga padamuon gid niya ang mga Israelinhon pareho sa mga bituon sa langit.

24 Ginsuguran ni Joab nga anak ni Zeruya ang pagsensos sa mga tawo pero wala niya ini matapos tungod naakig ang Dios sa sini nga sensos. Gani wala malista sa listahan ni Haring David ang kabug-usan nga kadamuon sang mga Israelinhon.

Ang mga Opisyal sa Ginharian

25 Si Azmavet nga anak ni Adiel amo ang nagadumala sang mga bodega sang palasyo sang hari.

Si Jonatan nga anak ni Uzia amo ang nagadumala sang mga bodega sa mga distrito, mga banwa, mga baryo, kag sa mga tore.

26 Si Ezri nga anak ni Kelub amo ang nagadumala sang mga nagaobra sa umasang hari.

27 Si Shimei nga taga-Rama amo ang nagadumala sang mga talamnan sang ubassang hari.

Si Zabdi nga taga-Shifam amo ang nagadumala sang mga ubas kag mga binosang hari.

28 Si Baal Hanan nga taga-Geder amo ang nagadumala sang mga kahoy nga olibo kag sikomoro sa mga bulobukid sa nakatundan.

Si Joash amo ang nagadumala sang mga talaguan sang lanasang olibo.

29 Si Shitrai nga taga-Sharon amo ang nagadumala sang mga baka nga nagahalab sa Sharon.

Si Shafat nga anak ni Adlai amo ang nagadumala sang mga baka sa mga kapatagan.

30 Si Obil nga Ishmaelinhon amo ang nagadumala sang mga kamelyo.

Si Jedea nga taga-Meronot amo ang nagadumala sang mga asno.

31 Si Jaziz nga Hagarnon amo ang nagadumala sang mga karnero.

Amo ini sila tanan ang mga opisyal nga nagadumala sang mga pagkabutang ni Haring David.

32 Si Jonatan nga tiyo niHaringDavid amo ang iya manuglaygay. Isa siya ka maalamon nga tawo kag manunulat. Si Jehiel nga anak ni Hacmoni amo ang manunudlo sang mga anak sang hari.

33 Si Ahitofel ang isa pa ka manuglaygay sang hari. Si Hushai nga Arkhanon malapit nga abyan sang hari.

34 Sang mapatay si Ahitofel, ginbuslan siya ni Jehoyada (nga anak ni Benaya) kag ni Abiatar. Si Joab amo ang kumander sang mga soldado sang hari.

Ang Plano ni David para sa Templo

1 Karon, ginpatawag niHaringDavid sa Jerusalem ang tanan nga opisyal sang Israel: Ang mga opisyal sang mga tribo, ang mga kumander sang kada grupo sang mga soldado nga nagaalagad sa hari, ang iban pa nga mga kumander sang linibo kag ginatos nga mga soldado, ang mga opisyal nga nagadumala sang tanan nga pagkabutang kag kasapatan sang hari kag sang iya mga anak, ang mga opisyal sang palasyo, ang gamhanan nga mga tawo, kag ang tanan nga maayo nga mga soldado.

2 Sang nagatilipon na sila,nagtindog si David kag nagsiling, “Pamatii ninyo ako, mga kauturan kag katawhan ko. Gusto ko gid magpatindog sang templo para butangan sang Kahon sang Kasugtanan sangGinoonga aton Dios, para may tulungtungan ang iya tiil. Kag nakaplano na ako sa pagpatindog sini.

3 Pero nagsiling ang Dios sa akon, ‘Indi ikaw ang magapatindog sang templo para sa akon kadungganan, tungod kay isa ikaw ka soldado kag madamo ang imo ginpamatay.’

4 Pero sa pihak sina, ginpili ako sangGinoo, ang Dios sang Israel, halin sa bug-os namon nga pamilya nga mangin hari sang Israel hasta san-o.Ginpili niya ang tribo sang Juda bilang pangulo nga tribo. Kag halin sa sini nga tribo, ginpili niya ang akon pamilya, kag halin sa akon pamilya ginkalipay niya ang pagpili sa akon bilang hari sang bug-os nga Israel.

5 Ginhatagan niya ako sang madamo nga mga anak nga lalaki, kag halin sa ila, ginpili niya si Solomon sa paghari sa iya ginharian nga amo ang Israel.

6 Nagsiling siya sa akon, ‘Ang imo anak nga si Solomon amo ang magapatindog sang akon templo kag sang iya sini mga lagwerta. Kay ginpili ko siya nga mangin akon anak, kag ako mangin iya amay.

7 Kag kon magpadayon siya sa pagsunod sang akon mga sugo pareho sang iya ginahimo subong, paharion ko ang iya mga kaliwat hasta san-o.’

8 “Gani karon, ginamanduan ko kamo sa atubangan sang tanan nga Israelinhon, ang katilingban sangGinoo, kag sa presensya sang aton Dios, nga tumana ninyo sing maayo ang tanan nga sugo sangGinoonga inyo Dios. Kon himuon ninyo ini, padayon ninyo nga panag-iyahan ining maayo nga duta, kag maipapanubli ninyo ini sa inyo mga kaliwat hasta san-o.

9 “Kag ikaw, Solomon nga anak ko, kilalaha kag alagara ang Dios sang imo amay sa bug-os mo nga tagipusuon kag hunahuna, kay nakita sangGinooang tagsa ka tagipusuon kag nahibaluan niya ang aton motibo kag panghunahuna. Kon magdangop ka sa iya, buligan ka niya; pero kon magbiya ka sa iya, sikwayon ka niya hasta san-o.

10 Ganihunahunaa ini sing maayo. Ginpili ka sangGinoosa pagpatindog sang templo para didto siya simbahon. Magpakabakod ka, kag himua ini nga buluhaton.”

11 Dayon ginhatag ni David kay Solomon angtanan ngaplano sa pagpatindog sang templo kag sa iya sini nga balkon, mga bilding, mga bodega, mga kuwarto sa ibabaw, mga kuwarto sa sulod, kag angLabing Balaan nga Lugar ngasa diin ginapatawad ang mga salasang tawo.

12 Ginhatag ni David ining tanan nga plano nga gintudlo sa iya sang Espiritupara sa pagpatindog sang mga lagwerta sang templo sangGinoo, sang tanan nga kuwarto sa palibot sini, kag sang mga bodega sang templo sang Dios, lakip na ang mga bodega para sa mga butang nga ginhalad.

13 Gintudluan man niya si Solomon parte sa paggrupo sang mga pari kag mga Levita kag sa tanan nga buluhaton sa pag-alagad sa templo sangGinoo, subong man sa tanan nga kagamitan sa pag-alagad.

14 Nagtudlo man siya kon pila kadamo nga pilak kag bulawan ang gamiton sa paghimo sang sini nga mga kagamitan:

15 sa bulawan nga mga suga kag mga bulutangan sini; sa pilak nga mga suga kag mga bulutangan sini;

16 sa bulawan nga mga lamisa nga ginabutangan sang tinapay nga ginahalad sa presensya sang Dios; sa pilak nga mga lamisa;

17 sa bulawan nga mga tinidor nga dalagko; sabulawan ngamga yahong kag mga pitsil; sa bulawan kag pilak nga mga pinggan;

18 kag sa bulawan nga halaran nga sulunugan sang insenso. Gintudluan man ni David si Solomon kon paano ang paghimo sang bulawan nga kerubin nga nagahumlad ang ila mga pakpak sa ibabaw sang Kahon sang Kasugtanan sangGinoo.

19 Nagsiling si Haring David,“Ini nga mga plano ginsulat suno sa pagtuytoy sangGinoo, kag gintudluan niya ako kon paano ini tanan himuon.”

20 Nagsiling man si David sa iya anak nga si Solomon, “Magpakabakod ka kag magpakaisog. Suguri na ang pagpaobra. Indi ka magkahadlok ukon magkaluya, kay angGinoongDios, ang akon Dios, kaupod mo. Indi ka niya pagbayaan ukon pagpabay-an hasta matapos ang tanan nga obra para sa templo sangGinoo.

21 Preparado na ang grupo sang mga pari kag mga Levita para sa tanan nga obra sa templo sang Dios, kag may mga tawo man nga may mga abilidad sa pag-obra sa bisan ano nga buluhaton nga handa sa pagbulig sa imo. Ang mga opisyal kag ang tanan nga tawo handa sa pagtuman sa imo.”

Ang mga Regalo sa Pagpatindog sang Templo

1 Dayon nagsiling si Haring David sa bug-os nga katilingbansang Israel, “Si Solomon nga akon anak nga ginpili sang Dios bataon pa kag wala sing eksperiensya. Dako ang buluhaton, kay ang patindugon nga bilding indi para sa tawo kundi para saGinoongDios.

2 Ginhimo ko ang tanan nga akon mahimo sa pagpreparar sang mga materyales para sa templo sang akon Dios—madamo nga bulawan, pilak, saway, salsalon, kahoy, malahalon nga mga bato nga onix, esmeralda, mga bato nga nagkalain-lain ang kolor, kag iban pa nga matahom nga mga bato kag mga marmol.

3 Kag tungod sa akon dedikasyon sa templo sang akon Dios, ginahatag ko ang akon personal nga mga bulawan kag pilak para sa pagpatindog sini, wala labot sa mga materyales nga natipon ko na para sa balaan nga templo.

4 Ang akon ihatagmga 100 ka tonelada nga bulawan halin sa Ofir, kag mga 250 ka tonelada nga pilak. Ini gamiton para inughaklap sa mga dingding sang templo,

5 kag para sa tanan nga kagamitan nga pagahimuon sang mga platero. Karon, sin-o ang luyag maghatag para saGinoo?”

6 Dayon naghatag sing kinabubut-on ang mga pangulo sang mga pamilya, mga pangulo sang mga tribo sang Israel, mga kumander sang linibo kag ginatos nga mga soldado, kag ang mga opisyal nga gintugyanan sa pagdumala sang mga pagkabutang sang hari.

7 Naghatag sila para sa pag-obra sang templo sang Dios sing mga 175 ka tonelada nga bulawan, 10,000 ka bulawan nga kuwarta, 350 ka tonelada nga pilak, 630 ka tonelada nga saway, kag 3,500 ka tonelada nga salsalon.

8 May mga naghatag man sang mga malahalon nga mga bato, kag gintago ini sa bodega sang templo sangGinoonga gindumalahan ni Jehiel nga kaliwat ni Gershon.

9 Nalipay gid ang mga tawo sa ila mga pangulo kay naghatag sila sing kinabubut-on kag tinagipusuon para saGinoo. Puwerte man ang kalipay ni Haring David.

Ang Pangamuyo ni David

10 Gindayaw ni David angGinoosa atubangan sang bug-os nga katilingban. Siling niya,

“OGinoo, Dios sang amon katigulangan nga si Jacob,dalayawon ka sa wala sing katapusan.

11 Gamhanan ka gid, talahuron, dungganon, kag dalayawon. Kay imo ang tanan nga butang sa langit kag sa duta. Ikaw ang hari, OGinoo, kag labaw ka sa tanan.

12 Ang manggad kag dungog naghalin sa imo. Ikaw ang nagadumala sang tanan nga butang. Gamhanan ka gid, kag ikaw ang nagapakusog kag nagapagamhanan sa kay bisan sin-o.

13 “Karon, O amon Dios, ginapasalamatan ka namon kag ginadayaw ang imo talahuron nga ngalan.

14 Pero sin-o gid ako kag ang akon katawhan nga makahatag kami sing bugana pareho sini? Tanan nga butang nagahalin sa imo, kag ginahatag lang namon ang naghalin sa imo.

15 Nakahibalo ikaw nga umalagi lang kami diri sa kalibutan pareho sang amon mga katigulangan. Ang amon kabuhi pareho sa landong nga wala nagapabilin.

16 “OGinoonga amon Dios, ining tanan nga ginhatag namon sa pagpatindog sang templo para sa kadungganan sang imo balaan nga ngalan naghalinmansa imo. Imo ini tanan!

17 O Dios ko, nahibaluan ko nga ginausisa mo ang amon tagipusuon kag nalipay ka kon makita mo nga matarong ini.Amo ina ngasinsero kag kinabubut-on ang paghatag ko sang sini nga mga butang. Kag bisan ang imo katawhan nga ari diri subong nakita ko nga nagahatag man sing kinabubut-on. Gani nalipay gid ako.

18 “OGinoo, ang Dios sang amon mga katigulangan nga si Abraham, Isaac, kag Jacob, kabay pa nga ibutang mo permi ini nga handom sa tagipusuon sang imo katawhan, kag buligi sila nga magmatutom sa imo.

19 Kag buligi man ang akon anak nga si Solomon nga mangin matutom gid siya sa pagtuman sang imo mga sugo, mga pagpanudlo, kag mga pagsulundan, kag sa paghimo sang tanan nga imo ginapatuman parte sa pagpatindog sang templo nga akon ginpreparar.”

20 Dayon nagsiling si David sa bug-os nga katilingban, “Dayawa ninyo angGinoonga inyo Dios.” Gani gindayaw nila angGinoo, ang Dios sang ila mga katigulangan. Nagluhod sila kag nagduko sa pagpadungog saGinookag sa hari.

Ginkilala si Solomon Bilang Hari

21 Pagkadason nga adlaw naghalad sila saGinoosang mga halad nga ginasunog: 1,000 ka turo nga baka, 1,000 ka gulang nga karnero nga lalaki, kag 1,000 ka bataon nga karnero nga lalaki. Naghalad man sila sang mga halad nga ilimnon kag sang madamo pa nga mga halad para sa bug-os nga Israel.

22 Nagkinaon sila kag nag-ininom nga malipayon sa presensya sangGinoosadto nga adlaw.

Kag sa liwat, gindeklarar nila nga hari si Solomon nga anak ni David. Ginhaplasan si Solomon sang lana sa presensya sangGinoobilang hari, kag ginhaplasan man si Zadok bilang pari.

23 Gani nagpungko si Solomon sa trono sangGinoobilang hari sa pagbulos sa iya amay nga si David. Nagmainuswagon si Solomon, kag nagtuman sa iya ang bug-os nga Israel.

24 Nagpromisa ang tanan nga opisyal, ang gamhanan nga mga tawo, kag ang tanan nga anak nga lalaki ni Haring David nga magpasakop sila kay Haring Solomon.

25 Ginpabantog sangGinoosi Solomon sa bug-os nga Israel kag ginhatagan niya siya sang kadungganan nga wala maangkon sang iban nga mga hari sa Israel.

Ang Pagkapatay ni David

26-27 Naghari si David nga anak ni Jesse sa bug-os nga Israel sa sulod sang 40 ka tuig—7 ka tuig sa Hebron kag 33 ka tuig sa Jerusalem.

28 Nagkabuhi siya sing malawig nga manggaranon kag dungganon. Napatay siya nga tigulang na gid, kag ginbuslan siya sang iya anak nga si Solomon bilang hari.

29 Ang estorya parte sa paghari ni Haring David, halin sa ginsuguran hasta sa katapusan, nasulat sa mga libro sang mga propeta nga sila ni Samuel, Natan kag Gad.

30 Nasulat dira kon paano siya naghari, ano siya kagamhanan, kag ang tanan nga natabo sa iya kag sa Israel, kag sa palibot nga mga ginharian.