Category: Job

Ang Matarong nga Kabuhi ni Job

1 May isa ka tawo nga nagaestar sa duta sang Uz nga ang iya ngalan si Job. Matarong kag wala sing kasawayan ang iya kabuhi. Nagatahod siya sa Dios kag nagalikaw sa paghimo sang malain.

2 May pito siya ka anak nga lalaki kag tatlo ka babayi.

3 May 7,000 siya ka karnero, 3,000 ka kamelyo, 500 ka paris sang mga baka, kag 500 ka asno nga babayi. May madamo man siya nga mga suluguon. Siya ang pinakamanggaranon sa tanan nga tawo sa sidlangansang Israel.

4 Kinabatasan na sang iya mga anak nga lalaki ang pagbulos-bulos hiwat sang punsyon sa ila mga balay kag ginaimbitar nila ang ila tatlo ka utod nga babayi sa pagtambong.

5 Kada tapos sang punsyon, nagahalad gid si Job para matinluan ang iya mga anak. Aga pa siya nagabugtaw kag nagahalad sang mga halad nga ginasunog para sa tagsa niya ka anak kay nagahunahuna siya nga basi nakasala ang iya mga anak kag nakahambal sang malain kontra sa Dios sa ila tagipusuon. Amo ina permi ang ginahimo ni Job.

Ang Una nga Pagtilaw kay Job

6 Isa ka adlaw, nagtipon ang mga anghelsa presensya sangGinoo, kag nag-upod sa ila si Satanas.

7 Nagsiling angGinookay Satanas, “Diin ka naghalin?” Nagsabat si Satanas saGinoo, “Naglibot-libot sa kalibutan.”

8 Nagsiling angGinoosa iya, “Natalupangdan mo bala ang akon alagad nga si Job? Wala sing pareho sa iya sa kalibutan. Matarong kag wala sing kasawayan ang iya kabuhi. Nagatahod siya sa akon kag nagalikaw sa paghimo sang malain.”

9 Nagsabat si Satanas, “Ginatahod ka lang niya tungod kay ginapakamaayo mo siya.

10 Ginaprotektaran mo siya kag ang iya panimalay, pati ang tanan niya nga pagkabutang. Ginapakamaayo mo ang tanan niya nga ginahimo, gani nagdamo ang iya kasapatan sabug-os ngaduta.

11 Pero kuhaa bala ang tanan nga ara sa iya, kag sigurado gid nga pakamalauton ka niya.”

12 Nagsiling angGinookay Satanas, “Sige, kuhaa ang tanan nga ara sa iya, pero indi lang siya pag-anha.” Gani naghalin si Satanas sa presensya sangGinoo.

13 Isa ka adlaw, samtang nagapunsyon ang mga anak ni Job sa balay sang kamagulangan nila nga utod,

14 may nag-abot nga isa ka tawo kay Job kag nagbalita, “Samtang ginaarado namon ang imo mga baka kag nagahalab ang imo mga asno nga babayi sa unhan lang,

15 gulpi lang nga ginsalakay kami sang mga Sabeanhon. Ginpangdala nila ang mga sapat, kag ginpamatay ang imo mga suluguon. Ako lang gid ang nakapalagyo sa pagsugid sa imo.”

16 Samtang nagahambal pa ang tawo, nag-abot ang isa naman ka tawo kag nagbalita, “Naigo sang kilat ang imo mga karnero kag ang mga manugbantay sini, kag nasunog sila. Ako lang gid ang nakapalagyo sa pagsugid sa imo.”

17 Samtang nagahambal pa ang tawo, nag-abot ang isa pa ka tawo kag nagbalita, “Ginsalakay kami sang tatlo ka grupo sang mga Kaldeanhon. Ginpamatay nila ang kaupod ko nga mga suluguon kag ginpangdala ang imo mga kamelyo. Ako lang gid ang nakapalagyo sa pagsugid sa imo.”

18 Samtang nagahambal pa ang tawo, nag-abot pa gid ang isa ka tawo kag nagbalita, “Samtang nagapunsyon ang imo mga anak didto sa balay sang ila kamagulangan nga utod,

19 gulpi lang nag-abot ang mabaskog nga hangin halin sa desierto, kag nawasak ang bug-os nga balay. Narumpagan ang imo mga anak kag nagkalamatay sila. Ako lang gid ang nakapalagyo sa pagsugid sa imo.”

20 Pagkabati sadto ni Job,nagtindog siya kag gin-gisi niya ang iya bayosa kasubo. Dayon ginpakiskisan niya ang iya ulo kag naghapa siya sa dutasa pagsimba saGinoo.

21 Nagsiling siya, “Natawo ako nga wala sing dala kag mapatay man ako nga wala sing dala. AngGinooang naghatagsang tanan nga ara sa akon, kag siya man ang nagkuhasini. Dalayawon ang ngalan sangGinoo!”

22 Sa pihak sang tanan nga natabo, wala makasala si Job paagi sa pagbasol sa Dios.

Ang Ikaduha nga Pagtilaw kay Job

1 Isa ka adlaw, nagtipon naman ang mga anghelsa presensya sangGinoo, kag nag-upod naman sa ila si Satanas.

2 Nagsiling angGinookay Satanas, “Diin ka naghalin?” Nagsabat si Satanas saGinoo, “Naglibot-libot sa kalibutan.”

3 Nagsiling angGinoosa iya, “Natalupangdan mo bala ang akon alagad nga si Job? Wala sing pareho sa iya sa kalibutan. Matarong kag wala sing kasawayan ang iya kabuhi. Nagatahod siya sa akon kag nagalikaw sa paghimo sang malain. Kag nagpabilin gihapon siya nga matutom sa akon bisan gin-ganyat mo akonga tugutan kasa paghalit sa iya sa wala sing rason.”

4 Nagsabat si Satanas, “Batunon sang tawo nga madula ang tanan sa iya basta buhi lang siya.

5 Pero siya bala mismo ang haliti kag sigurado gid nga pakamalauton ka niya.”

6 Nagsiling angGinookay Satanas, “Sige, himua ang gusto mo nga himuon sa iya, pero indi lang siya pagpatya.”

7 Gani naghalin si Satanas sa presensya sangGinookag ginhalitan niya si Job paagi sa mga hubag nga nagtubo halin sa iya dapadapa hasta sa ulo.

8 Nagkuha si Job sang buka nga kolon kag ginkagis ang iya panit samtang nagapungko siya sa abo.

9 Nagsiling ang iya asawa sa iya, “Matutom ka pa gihapon sa Dios? Pakamalauta siya agod nga mapatay ka na!”

10 Nagsabat si Job, “Wala sing pulos ang imo ginahambal. Ang mga maayo lang bala nga mga butang ang aton batunon halin sa Dios, kag indi ang mga malain?”

Sa pihak sang natabo sa iya, wala makasala si Job paagi sa paghambal sing malain.

Ang Tatlo ka Abyan ni Job

11 May tatlo ka abyan si Job nga sila ni Elifaz nga taga-Teman, Bildad nga taga-Shua, kag Zofar nga taga-Naama. Sang mabatian nila ang tanan nga kalisod nga nag-abot kay Job, nagsugtanay sila nga kadtuan siya agod ugyunan sa iya nga kasubo kag lipayon.

12 Sang medyo malayo pa sila, nakita na nila si Job, kag daw indi nila siya halos makilala. Naghibi sila sing tudo kag gin-gisi nila ang ila mga bayo kag ginwisikan sang yab-ok ang ila mga ulosa pagpakita sang ila kasubo.

13 Dayon nagpungko sila sa duta upod kay Job sa sulod sang pito ka adlaw kag pito ka gab-i. Wala gid sila naghambal sa iya tungod nakita nila kon daw ano gid ang iya pag-antos.

Naghambal si Job

1 Sang ulihi naghambal si Job kag ginpakamalaot niya ang adlaw sang iya pagkatawo.

2 Nagsiling siya,

3 “Ginapakamalaot ko ang adlaw sang akon pagkatawo.

4 Nangin madulom kuntani ina nga adlaw kag wala na ginsilakan pa sang adlaw. Wala na kuntani ina gindumdom pa sang Dios nga ara sa langit.

5 Natabunan na lang kuntani ina sang kadulom ukon sang madamol nga gal-om, kag ginlikupan na lang kuntani sang kadulom ang iya kasanag.

6 Nangin madulom gid kuntani ina nga gab-isang akon pagkatawo, kag wala na lang kuntani ina ginlakip sa kalendaryo.

7 Wala na kuntani ako matawo sa sina nga gab-i, kag wala na kuntani sing may nagkinalipay sadto nga tion.

8 Kabay pa nga pakamalauton ina nga gab-i sang mga manugpakamalaot nga kahibalo magpukaw sadragon ngaLeviatan.

9 Wala na kuntani magsiga ang kabugwason sang sina nga adlaw, kag wala na kuntani mag-aga.

10 Ginapakamalaot ko ina nga adlawkay wala niya ginpunggan ang akon pagkatawo agod indi ko maeksperiensyahanini nga mgakalisod.

11 “Maayo pa kuntani nga napatay na lang ako sa tiyan sang akon iloy.

12 Ngaa bala ginsabak pa akosang akon iloykag ginpatiti?

13 Kon napatay lang ako sadto, malinong na kuntani ako subong, nga nagakatulog kag nagapahuway

14 upod sa mga hari kag mga pangulo sang kalibutan nga nagpatindog sang mga palasyonga guba na subong.

15 Nagapahuway man kuntani akoupod sa mga manugdumala nga ang ila mga balay puno sang bulawan kag pilak.

16 Maayo pa kuntani nga pareho na lang ako sang mga bata nga napatay sa ila pagkatawo kag ginlubong, nga wala na makakita sang kasanag.

17 Didto sa lugar sang mga patay, ang mga malaot wala na nagahimo sing malain kag ang mga kapoy nagapahuway na.

18 Kag didto, ang mga bihag nagapatawhay-tawhay na kag indi na nila mabatian ang singgit sang mga tawo nga nagapilit sa ila sa pag-obra.

19 Ang tanan nga klase sang tawo ato didto, bantog man ukon indi. Kag ang mga ulipon hilway na didto sa ila mga agalon.

20 “Ngaa ginatugutan pa nga mabuhi ang tawo nga nagaantos kag nagasakit ang ila buot?

21 Nagahandom sila nga mapatay, pero wala sila mapatay. Ginapangita nila ang kamatayon nga sobra pa sa pagpangita sang tawo sang manggad nga natago.

22 Malipayon lang sila kon patay na sila kag malubong na.

23 Ngaa ginatugutan pa nga mabuhi ang tawo nga wala man lang siya kahibalo sang iya dangatan? Ginbuot sang Dios nga indi niya mahibaluan ang iya palaabuton.

24 Indi ako makakaon sa sobra nga pagpangasubo, kag wala nagauntat ang akon pag-ugayong.

25 Ang ginakahadlukan ko natabo sa akon.

26 Wala ako sing kalinong kag katawhayan. Kag wala ako sing kapahuwayan kundi kagamo lang.”

Naghambal si Elifaz

1 Dayon nagsabat si Elifaz nga taga-Teman,

2 “Maakig ka bala kon maghambal ako? Indi mahimo nga maghipos lang ako.

3 Sadto anay madamo nga mga tawo ang gintudluan monga magsalig sa Dios. Ginpabakod mo ang mga tawo nga maluya.

4 Ang imo mga pulong nakapalig-on sa nagakaluya kag nagakatumba.

5 Pero karon nga ikaw naman ang nagaantos, nagakaluya ka kag nagakatublag.

6 Indi bala nga kon nagatahod ka sa Dios kag matarong ang imo kabuhi, may pagsalig ka kag paglaom?

7 “Karon, hunahunaa bala sing maayo. May tawo bala nga inosente ukon matarong nga nalaglag?

8 Suno sa akon naobserbaran, ang nagahimo sang kalautan kag kagamo, kalautan kag kagamo man ang iya dangatan.

9 Nagakalaglag sila sa isa lang ka huyop sang Dios. Sa iya kaakig, nagakapukan sila.

10 Bisanpareho pa silasa isa ka makusog kag mabangis nga leon, bingawon gihapon sang Dios ang ila mga ngipon.

11 Magakalamatay sila tungod sa gutom, kag ang ila mga anak magalalapta.

12 “May ginsugid sa akon sa sekreto. Ginhutik ini sa akon

13 sa damgo sang isa ka gab-i samtang nagatulog sing mahamuok ang mga tawo.

14 Hinadlukan ako kag nagkurog ang bug-os ko nga lawas.

15 May espiritu nga naglabaysa akon guya kag nagpalanindog ang akon mga balahibo.

16 Pagkauntat sini, may nakita dayon ako nga daw sa may nagatindog, pero indi ini klaro sa akon. Dayon may nabatian ako nga mahinay nga tingog nga nagasiling,

17 ‘May tawo bala nga matarong sa atubangan sang Dios? May tawo bala nga matinlo sa atubangan sang iya Manunuga?

18 Kon wala gani nagasalig ang Dios sa mga anghel nga iya mga alagad, kag makakita siya sang sayop sa ila,

19 ano pa ayhan sa mga tawo nga hinimo lang halin sa duta, nga madali lang dugmukon pareho sa sapat-sapat!

20 Buhi sila sa aga, pero pagkagab-i patay na. Indi na sila makita hasta san-o.

21 Daw sa mga tolda sila nga narumpag. Napatay sila nga kulang sing kaalam.’

1 “Job,bisan magpangayo ka pa sang bulig, wala sing may magbulig sa imo. Bisan ang mga anghelindi magbulig sa imo.

2 Ang kaakig kag kaimon nagapatay sa buang-buang nga tawo, nga wala sing kaalam.

3 Sa akon naobserbaran, posible nga ang isa ka buang-buang nga tawo mag-uswag sa iya pangabuhi, pero gulpi lang nga pakamalauton sang Dios ang iya panimalay.

4 Ang iya mga anak wala sing makadtuan nga makabulig sa ila,kag wala sing may magpangapin sa ila sa korte.

5 Ang iya mga patubas, pati ang mga bunga sang iya mga tanom nga nagatubo sa tunukon nga mga kahoy-kahoy, ginapanguha sang gutom nga mga tawo. Kag ang iya manggad ginapanguha sang mga tawo nga uhawsa mga pagkabutang.

6 Ang kalisod kag kabudlayan wala nagatubo sa duta.

7 Ang tawo amo ang nagadala sang kalisod sa iya kaugalingon, subong nga ang alipaloknagalupad paibabawhalin sa kalayo.

8 “Kon ako sa imo, madangop ako sa Dios kag ipresentar ko ang akon kahimtangan sa iya.

9 Kaynagahimo siya sang makatilingala nga mga butang kag mga milagro nga indi matungkad kag indi maisip.

10 Nagapadala siya sang ulan sa kalibutan kag ginapatubigan niya ang mga uma.

11 Ginapataas niya ang mga kubos, kag ginaluwas ang mga nagakalisod.

12 Ginaguba niya ang mga plano sang madaya nga mga tawo, agod indi sila magmadinalag-on.

13 Ginadakop niya ang mga maalam sa ila pagkadayaon, kag ginatapna niya ang padihot sang mga dayaon.

14 Ginadulman sila bisan adlaw, kag nagapangapkap sila nga daw gab-i bisan udtong-adlaw.

15 Ginaluwas sang Dios ang mga imol sa kamatayon kag sa gamhanan nga mga tawo nga nagapigos sa ila.

16 Gani may paglaom ang mga imol, pero ang mga malaot ginatapna sang Dios.

17 “Bulahan ang tawo nga ginatadlong sang Dios ang iya pamatasan. Gani indi pagpakalaina ang pagdisiplina sang Makagagahomnga Diossa imo.

18 Kay ang iya ginapilas, iya man ginabulong; ang iya ginasakit, iya man ginaayo.

19 Permi niya ikaw luwason sa kalamidad kag katalagman.

20 Luwason niya ikaw sa kamatayon sa tion sang gutom ukon inaway.

21 Protektaran niya ikaw sa pagpakalain sa imo sang iban, kag wala ka sing kahadlukan kon mag-abot ang kalaglagan.

22 Kadlawan mo lang ang kalaglagan kag gutom, kag indi ka mahadlok sa talunon nga mga sapat,

23 kay indi na ini mag-ano sa imo. Kag indi ka na mabudlayan magtanom sa imo batuhon nga uma.

24 Makasiguro ka nga maayo ang kahimtangan sang imo panimalay, kag wala sing may madula sa imo kasapatan.

25 Magadamo ang imo mga kaliwat pareho kadamo sang hilamon sa duta.

26 Magakabuhi ka sing malawig, kag indi ka mapatay sa indi pa husto nga tion.

27 Suno sa amon pag-usisa, matuod gid ini tanan. Gani pamatii ini kag iaplikar sa imo kabuhi.”

Naghambal si Job

1 Dayon nagsabat si Job,

2 “Kon makilo lang ang akon mga pag-antos kag mga kalisod,

3 mas mabug-at pa ini sang sa balas sa baybayon. Amo ina kon ngaa nagahambal ako sang mga pulong nga wala ko ginahunahuna sing maayo.

4 Kay daw sa ginpana ako sang Makagagahomnga Diossang makahililo nga pana,kag ang hilo sini naglapta sa akon bug-os nga lawas. Ang makahaladlok nga mga pana sang Dios napuntirya sa akon.

5 Wala bala ako sing kinamatarong sa pagreklamo? Bisan gani ang asno kag baka nagaimakon wala sing hilamon ukon kumpay.

6 Ang tawo nagareklamo man kon wala sing asin ang iya pagkaon, labi na kon ang iya ginakaon puti sang itlog.

7 Bisan ako wala sing gana sa pagkaon sina.

8 “O kuntani ihatag sang Dios ang akon ginapangayo. Kuntani mabaton ko ang akon ginahandom.

9 Ang akon ginahandom amo nga patyon na lang ako kuntani sang Dios.

10 Kag kon matabo ini, malipayon gihapon ako, kay sa pihak sang akon mga pag-antos wala ko gid ginsikway ang mga pulong sang Balaannga Dios.

11 “Wala na ako sing kusog nga maglaom pa. Wala na man ako sing may ginalauman pa, ngaa magpadayon pa ako sa pagkabuhi?

12 May kalig-on bala ako pareho sa bato? Saway bala ang akon lawas?Indi!

13 Wala ako sing kusog sa pagluwas sa akon kaugalingon. Wala na ako sing tsansa nga magmadinalag-on pa.

14 “Bilang mga abyan kuntani mag-unong kamo sa akon pag-antos, bisansa inyo pagtan-awginsikway ko ang Makagagahomnga Dios.

15 Pero kamo nga ginakabig ko nga mga utod indi masaligan; pareho kamo sa ililigan sang tubig nga nagaawas

16 kon mapun-an sang natunaw nga yelo kag snow,

17 kag nagamala sa tion sang tig-ilinit.

18 Kon mag-agi sa sapa ang grupo sang mga tawo nga nagapanglakaton, wala sila sing tubig nga mainom didto, gani pag-abot nila sa desierto nagakalamatay sila.

19 Ang mga negosyante nga taga-Tema kag taga-Sheba nga nagapanglakaton nagalaom nga makainom sila sa sapa,

20 pero napaslawan sila. Naglaom sila nga may tubig didto, pero pag-abot nila wala gali.

21 Huo, pareho gid kamo sa sapa. Wala man kamo sing may mabulig sa akon. Hinadlukan kamo sang makita ninyo ang akon makahaladlok nga kahimtangan.

22 Pero ngaa? Nangayo bala ako sa inyo sang regalo? Nagpangabay bala ako sa inyo nga buligan ninyo ako halin sa inyo manggad,

23 ukon luwason ninyo ako sa kamot sang mapintas nga mga kaaway?

24 Wala!Ang ginapangabay ko lang amo nga sugiran ninyo ako sing husto nga sabat sa natabo sa akon, kag dayon mahipos na ako. Sugiri ninyo ako, diin bala ako nakasala?

25 Wala kaso kon masakit ang inyo ginahambal basta matuod lang. Pero ang inyo ginaakusar sa akon indi matuod, kag indi ninyo mapamatud-an.

26 Gusto ninyo nga tadlungon ang akon mga ginahambal, kay para sa inyo ang akon ginahambal bilang desperado nga tawo wala sing pulos.

27 Ngaa, matarong gid bala kamo? Mahimo gani ninyo nga ipaulipon ang isa ka ilo ukon ibaligya ang isa ka abyan!

28 Tuluka ninyo ako! Mabutig bala ako sa inyo?

29 Untati na ninyo ang inyo pag-akusar sa akon, kay wala ako sing sala.

30 Nagabutig bala ako? Indi bala ako makahibalo kon ano ang malain kag indi?

1 “Ang kabuhi sang tawo diri sa kalibutan mabudlay gid; pareho kabudlay sa adlaw-adlaw nga obra sang isa ka trabahador,

2 ukon pareho sa ulipon nga nagahandom nga maghapon na agod makapahuway na siya, ukon pareho sa trabahador nga nagapaabot gid sang iya suweldo.

3 Pareho man sina ang akon kahimtangan. Pila na ka bulan ang akon pag-antos nga wala man lang sing pulos. Bisan gab-i nagaantos ako.

4 Kon maghigda ako kon gab-i nagahunahuna ako kon san-o pa mag-aga. Kahinay sang paglakat sang mga inoras. Nagabulubaliswa lang ako hasta magpamanagbanag.

5 Ang akon lawas puno sang ulod kag kugan. Nagabuluswang ang akon mga hubag kag naganana.”

Nagpanawag si Job sa Dios

6 “Nagaligad ang akon mga inadlaw nga wala sing paglaom. Nagaligad ini nga mas madasig pa sa lansaderasang manughabol.

7 Dumduma,O Dios,nga ang akon kabuhi pareho lang sa hanginnga nagalabay, kag indi na ako makaeksperiensya pa sang kalipay.

8 Makita mo pa ako subong pero sa ulihi indi na. Kon mangita ka sa akon indi mo na ako makita.

9 Subong nga ang gal-om nagakadula kag indi na makita, ang nagakapatay indi na magbalik pa.

10 Indi na siya makapauli sa iya balay, kag malimtan na siya sang mga nakakilala sa iya.

11 “Gani indi mahimo nga maghipos lang ako; sugong gid ang akon pamatyag. Ihambal ko ang kalain sang akon buot.

12 Ngaa ginabantayan mo gid ako,O Dios? Dragon bala ako sa dagat?

13 Kon gusto ko maghigda kag magpahuway agod maghaganhagan ang akon kasakit

14 ginapahadlok mo ako paagi sa mga damgo kag palanan-awon.

15 Gani maayo pa nga makuga na lang ako kag mapatay sang sa mabuhi sa sining lawas nakon.

16 Ginakaugtan ko ang akon kabuhi. Indi ko gusto nga mabuhi pa. Pabay-i na lang ako, kay wala na sing pulos ang akon kabuhi.

17 “Ano gid bala ang tawo nga imo ginakabalak-an kag ginahatagan sang importansya?

18 Kay ginausisa mo siya kada adlaw, kag ginatilawan sa tanan nga tion.

19 Pabay-i lang bala ako bisan dali lang.

20 Nakasala bala ako? Ano nga sala ang nahimo ko sa imo, O Manugbantay sang tawo? Ngaa ginapuntirya mo gid ako? Mabug-at bala ako nga palas-anon sa imo?

21 Kon nakasala gid man ako, ngaa indi mo na lang ako pagpatawaron? Sa indi madugay mapatay na ako, kag bisan pangitaon mo ako, indi mo na ako makita pa.”

Naghambal si Bildad

1 Dayon nagsabat si Bildad nga taga-Shua,

2 “San-o ka bala mag-untat sa imo mga ginahambal? Kagahod sa imo kag wala sing pulos ang imo mga ginahambal.

3 Indi puwede nga lubagon sang Makagagahom nga Dios ang hustisya ukon tikuon ang husto.

4 Nakasala ang imo mga anak sa Dios, gani dapat lang nga silutan niya sila.

5 Pero kon magdangop ka sa Makagagahom nga Dios kag magpakitluoy sa iya,

6 kag magkabuhi nga matinlo kag matarong, bisan karon dayon buligan ka niya kag ibalik ang imo maayo nga kahimtangan.

7 Kag ang manggad nga mangin imo sa palaabuton mas dako gid kon ikomparar sa manggad mo sang una.

8 “Pamangkuta bala ang nahauna nga mga henerasyon. Hibalua kon ano ang natun-ansang ila mga katigulangan.

9 Kay daw bag-o lang kita natawo kag diutay lang ang aton nahibaluan, kag umalagi lamang kita sa kalibutan pareho sa landong nga wala nagadugay.

10 Pamatii sila, kay tudluan ka nila sang ila nahibaluan.

11 “Indi mabuhi ang tanom nga nagatubo sa tubig kon wala sing tubig.

12 Mapatay ini gilayon samtang nagatubo pa lang kag indi pa talapson.

13 Pareho man sina ang dangatan sang tanan nga tawo nga nagatalikod sa Dios. Wala sing paglaom ang tawo nga indi diosnon.

14 Ang tanan nga ginasaligan niya matapok pareho sa lawa sang damang.

15 Kon sandigan niya, nagakabugto dayon; kon uyatan niya, nagakahukas.

16 Kon tan-awon daw maayo ang iya kahimtangan,pareho sa tanom nga nabunyagan sing maayo kag nasilakan sang adlaw. Nagagapa ini sa katamnan

17 kag nagapanggamot sing maayo sa mga bato.

18 Pero kon magabot na ini, wala na sing may magsapak sini.

19 Amo ina ang katapusan sang iya kabuhi, kag may magatubo naman nga tanom sa duta nga iya gintubuan.

20 “Sa pagkamatuod, wala ginasikway sang Dios ang tawo nga wala sing kasawayan ang iya kabuhi, kag wala niya ginabuligan ang malaot nga tawo.

21 Pakadlawon ka niya liwat, kag pahugyawon sa kalipay.

22 Pakahuy-an niya ang imo malaot nga mga kaaway, kag laglagon ang ila mga panimalay.”

Naghambal si Job

1 Dayon nagsabat si Job,

2 “Huo, matuod inang ginasiling mo. Pero paano makapamatuod ang tawo nga inosente siya sa atubangan sang Dios?

3 Bisan baison pa niya ang Dios sa korte, wala siya sing may mahimo, kay sa isa ka libo nga pamangkot sang Dios bisan isa indi niya masabat.

4 Maalam kag gamhanan gid ang Dios. Sin-o bala ang nagkontra sa iya kag nagmadinalag-on?

5 “Sa wala sing paandam, ginauyog niya ang mga bukid kag nagakalatiphag ini sa iya kaakig.

6 Ginapalinog niya ang duta halin sa pundasyon sini.

7 Sa iya lang pagmando, puwede nga indi magbutlak ang adlaw kag indi magsiga ang mga bituon.

8 Siya lang ang nagahumlad sang kalangitan, kag siya lang ang nagapauntat sang balod.

9 Siya ang nagtuga sangmga grupo sang mga bituon nga ginatawagOso, Orion, Pleades, kag sang mga bituon sa bagatnan.

10 Nagahimo siya sang makatilingala nga mga butang kag mga milagro nga indi matungkad kag indi maisip.

11 Kon maglabay siya sa akon, indi ko siya makita kag mabatyagan.

12 Kon may gusto siya nga kuhaon, wala sing may makapugong sa iya. Sin-o bala ang makareklamo sa iya ginahimo?

13 Wala ginapunggan sang Dios ang iya kaakig. Bisan ang mga kabulig sangdragon nga siRahab nagaluhod sa kahadlok sa iya.

14 Gani paano ko madepensahan ang akon kaugalingon sa Dios? Ano ang ihambal ko para makipagbais sa iya?

15 Bisan inosente pa ako, indi ako makadepensa sang akon kaugalingon. Ang mahimo ko lang amo ang pagpakitluoy saDios ngaakon Manughukom.

16 Bisan pangabayon ko siya nga mag-atubangay kami kag magsugot siya, indi gihapon niya ako pagpamatian.

17 Kay ginapaantos niya ako nga daw sa ginasalakay sang bagyo, kag ginadugangan niya ang akon mga kasakit sa wala sing rason.

18 Daw halos indi niya ako pagpaginhawaon sing maayo sa mga kasakit nga ginapaantos niya sa akon.

19 Kon sa pakusog lang, makusog gid siya! Kag kon sa akusaray, sin-o ang makaakusar sa iya?

20 Bisan inosente pa ako, sentensyahan gihapon ako nga silutan tungod sang akon ginapanghambalsa pagdepensa sa akon kaugalingon.

21 Bisan wala sing kasawayan ang akon kabuhi, baliwala na ini sa akon. Ginakaugtan ko ang akon kabuhi.

22 Kay amo man lang gihapon; pareho lang nga laglagon sang Dios ang matarong kag ang malaot.

23 Nagakadlaw lang siya kon mapatay gulpi ang matarong sa kalamidad.

24 Gintugyanniyaang kalibutan sa mga malaot. Ginatabunan niya ang mata sang mga manughukom. Kon indi siya ang nagahimo sini, ti sin-o pa abi?

25 “Kadasig magligad sang mga inadlaw sang akon kabuhi;dawmas madasig pa sang sa manugdalagan. Nagaligad ini nga wala gid sing kalipay.

26 Huo, kadasig magligad sang akon kabuhi; pareho kadasig sang madasig nga sakayan ukon sang agila nga nagasibad.

27 Bisan indi na ako magreklamo kag untatan ko na ang pagpangasubo, kag magyuhom na ako,

28 mahadlok gihapon ako sa mga pag-antos nga mag-abot sa akon. Kay nahibaluan ko nga indi niya ako pagkabigon nga inosente.

29 Sanglit ginakabig niya ako subong nga nakasala, ano pa ang pulos sa pagpaninguha ko nga depensahan ang akon kaugalingon?

30 Bisan pa habunan ko ang akon bug-os nga lawas agod mangin matinlo ako,

31 itum-oy niya gihapon ako salunangon ngabuho, agod bisan ang akon bayo mangil-aran sa akon.

32 Indi tawo ang Dios pareho sa akon, gani indi ako makabais sa iya kag makaakusar sa iya sa korte.

33 Kuntani may makapatunga sa amon nga duha sa paghusay sa amon.

34 Kag mapauntat niya ang paghanot sang Dios sa akon, agod indi na ako mahadlok.

35 Dayon makahambal na ako sa iya nga wala sing kahadlok, pero sa karon indi ko pa ini mahimo.”

1 “Ginakangil-aran ko ang akon kabuhi, gani pagusto ako sa pagreklamo. Magahambal ako sa kalain sang akon buot.

2 Amo ini ang ihambal ko sa Dios: ‘Indi ako paghusgari nga malain ako, kundi pahibalua ako kon ano ang imo akusasyon kontra sa akon.

3 Nalipay ka bala sa pagpaantos sa akon? Ngaa ginasikway mo ako nga imo ginhimo kag ginapaburan mo ang mga padihot sang mga malaot?

4 Ang pagtan-aw mo bala pareho sa pagtan-aw sang tawo?

5 Pareho lang bala kalip-ot ang imo kabuhi sa tawo?

6 Ti, ngaa nagadali ka gid sa pagpangita sa akon sang sala?

7 Nahibaluan mo nga wala ako sing sala, pero sin-o ang makadepensa sa akon sa imo?

8 “ ‘Ikaw ang nagporma kag naghimo sa akon, kag karon laglagon mo ako?

9 Dumduma nga ginporma mo ako halin sa duta,kag karon ibalik mo na ako sa duta?

10 Ikaw ang nagporma sa akon sa tiyan sang akon iloy, nga daw pareho sa keso nga naporma halin sa gatas.

11 Ginporma mo ako nga may mga tul-an kag mga ugat kag ginputos sang unod kag panit.

12 Ginhatagan mo ako sang kabuhi kag ginpakitaan sang kaayo, kag gintipigan mo man ang akon kabuhi.

13 Pero karon nahibaluan ko nga ang matuod mo nga plano sa akon

14 amo nga bantayan mo ako kon makasala ako, kag dayon indi mo ako pagpatawaron.

15 Nakasala man ako ukon wala, pareho lang nga kaluluoy ako. Kay nahuy-an gid ako kag natam-an sa akon mga pag-antos.

16 Ginatinguhaan ko nga magbangon, pero ginatiid mo ako pareho sa leonagod laglagon. Ginapakita mo ang imo gahom kontra sa akon.

17 Sige-sige ang imo pag-akusar sa akon, kag nagadugang nga nagadugang ang imo kaakig sa akon. Wala sing untat ang imo pagsalakay sa akon.

18 “ ‘Ngaa bala gintugutan mo pa nga matawo ako? Kuntani napatay na lang ako sa wala pa sing may nakakita sa akon.

19 Kuntani wala na lang ako matuga. Napatay na lang kuntani ako sa tiyansang akon iloykag pagkabun-ag ginlubong deretso.

20 Diutay na lang nga tion ang nabilin sa akon, gani pabay-i na lang ako agod sa bisan malip-ot lang nga tion malipay man ako

21 sa wala pa ako magkadto sa lugar nga masubo kag madulom, nga sa diin indi na ako makabalik diri.

22 Puwerte gid kadulom didto; puro lang gab-i kag wala gid sang kasanag, kag wala didto sing kahusayan.’ ”